ايكنجيسى: إن شاء اﷲ عالى بر ذكا و غيرتى بولونان عبد المجيدى غيرته گتيردى. خلوصى‌يه ياقيشه‌جق چاليشقان، متيقّظ بر آرقداش اولدى

اوچنجيسى: او ذات مشتريدر كه ايليشمش، مشترى اولميان لاقيد قالير. إن شاء اﷲ ايلريده تام إستفاده ايده‌جك

بو نكته‌نڭ بر گوزل مئالنى يا سن، يا عبد المجيد قلمه آلوب، بنم سلاممله، ممنونيتمله برابر، او ذاته گوندره‌بيليرسڭز

محلّه‌ڭزڭ إمامى حافظ عُمَر أفندى‌يه سلام ايت و دى كه، بن اونى قبول ايتدم. طلبه‌لك شرطلرينى ده اوڭا سويله. پدريڭز و فتحى بك و خواجه عبد الرحمان، سوزلرى جدّى ديڭله‌مه‌لرى بنى چوق مسرور ايدييور. بن اونلره دعا ايدييورم. اونلر ده بڭا دعا ايتسينلر. سيدا نامنده‌كى ذات، پدريڭزڭ إنتساب ايتديگى ذات دگل، اوندن أوّل گلمش إشتهار ايتمش مهمّ بر ذاتدر. باشده صبرى، سليمان، توفيق، بتون إخوانلر سزه سلام ايدييورلر

سڭا بو دفعه يگرمى طوقوزنجى مكتوبڭ اوچنجى قسمنى و بشنجى قسمنى گوندرييورم. اوچنجى قسمده بر سرّ وار. رمضانده بر ساعتده، بنمله مسوّد ذات خسته ايكن سرعتله يازيلمش. گوره‌جگڭز طرز عينًا بولونمش، بز حيرت ايتدك. آڭلادق كه او قسمده قرآنه دائر نيّتمز تام حقدر و لازمدر كه، بويله اولمشدر