امّا سائر كتابلرده شو نوع توافقات بولونيشى تصادفه ويريله‌بيلير. فقط شو رساله‌لرده‌كى شعورلى توافقاتِ غيبيه‌يى، بتون گورن ذاتلرڭ إتّفاقيله، شعورسز تصادفه حواله ايديله‌مز و ويريلمسنه إمكان ويريلمييور. حتّى أڭ مهمّ ايكى مستنسخ و بزلر، دگل كه بر رساله‌نڭ عمومنده؛ بر تك صحيفه قناعت ويرر كه، تصادف قاريشه‌ماز، حدّى دگلدر. چونكه مِثل اولارق ايكى اوچ كلمه بولونور؛ بربرينه باقار اويله بر وضعيتده كه، ظاهرًا بر قصدى إرائه ايدييور

مثلا: شيمدى باقييورز، شو صحيفه‌ده ياش لفظى، اوچ دفعه تكرّر ايتمش. اوچى اويله بر وضعيتده بربرينه باقييور كه، شبهه بيراقماز كه، بر تنظيمِ غيبيدر. هم شيمدى باقديغمز شو صحيفه‌ده، يالڭز آلتى حزن كلمه‌سى وار. او آلتى حزن، اوچ سطرده اويله لطيف ايكى قوسى تشكيل ايتمش كه، نشئه‌لى بر حزنى گوره‌نه ويرر

هم إشارتِ غيبيه اولمق ايچون، باشقه هيچ بر كتابده بولونمامق لازم گلمز. مثلا: ناصلكه بلاغتِ قرآنيه درجۀِ إعجازه واصل اولديغى ايچون، بر معجزۀِ رسالت اولديغى حالده؛ سائر أهلِ بلاغتڭ عموم كتابلرنده، درجاتلرينه گوره بلاغت واردر. اونلرده بلاغت بولونماسى، إعجازِ قرآنه منافى اولاماز

اويله ده إعجازِ قرآنڭ يوزر قسمندن بر قسمنڭ جلوه‌سى، بر نوع إكرامِ إلٰهى نوعندن، قرآنڭ بر نوع تفسيرى اولان سوزلرده، حقائقِ قرآنيه‌نڭ حسنِ إنتظامنه إشارةً گورونوب تجلّى ايتمسنه، سائر كتابلرده توافقاتڭ بولونماسى ضرر ويرمز. چونكه او درجه‌يه يتيشمزلر. چونكه سوزلرده‌كى او نوع توافقات، او درجه‌يه گلمش كه، دقّت ايدنلره قطعى قناعت ويرر كه، بشرڭ دوشونشى دگل و إختياريله ده اولمامشدر. بلكه نقشى بر نوع قرآن إعجازينڭ گولگه‌سنڭ گولگه‌سى، كندى تفسيرينڭ آيينه‌سنده، بر نوع إكرامِ إلٰهى صورتنده تمثّل ايدييور. {اَلْحَمْدُ ِﷲِ هٰذَا مِنْ فَضْلِ رَبِّى}