دوقتور دوزينڭ وسائر زنديقلرڭ أثرلرينه ايليشمه‌مك، رسالۀِ نوره ايليشمك، غضبِ إلٰهينڭ جلبنه بر وسيله اولابيلير دييه قورقويورز. جنابِ حق سزه إنصاف و مرحمت و بزه ده صبر و تحمّل إحسان أيله‌سين. آمين!
غيرِ رسمى، فقط تجريدِ مطلقده
سعيد النورسى
❊ ❊ ❊
بِاسْمِهِ سُبْحَانَهُ
    {وَ شَاوِرْهُمْ فِى اْلاَمْرِ} أمريله، قارداشلرمله بر مشورته محتاجم.
    عزيز صدّيق قارداشلرم!
    شيمدى بر أمرِ واقع قارشيسنده بولونويورم. بنم إعاشه‌م ايچون هر گون ايكى بچق بانقنوط، هم يڭيدن بنم ايچون بر خانه (موبله‌سيله برابر و ايستديگم طرزده) ياپديرمق ايچون أمر گلمش. حالبوكه أللى آلتمش سنه‌لك بر دستورِ حياتم، بونى قبول ايتمه‌مك إقتضا ايدر. گرچه دار الحكمة الإسلاميه‌ده بر ايكى سنه معاشى قبول ايتدم، فقط او پاره‌يى كتابلريمڭ طبعنه صرف ايده‌رك و أكثرينى مجّانًا ملّته ويروب، ملّتڭ مالنى ينه ملّته إعاده ايتدم. شيمدى أگر مجبور اولسه‌م و سزه و رسالۀِ نوره ضرر گلمه‌مك ايچون قبول ايتسه‌م، ينه ايلريده ملّته إعاده ايتمك اوزره صاقلايه‌جغم. ضرورتِ قطعيه درجه‌سنده كنديمه يالڭز آز بر پارچه صرف ايده‌جگم.