عزيز، صدّيق قارداشلرم!
    سزه ملائكه‌يه عائد ”ميوه‌لرڭ بر پارچه‌سنى“ داها گوندردم. محكمه رئيسى، كتابلريمى بڭا ويره‌جگنى سويله‌مسى اوزرينه، دڭزلى‌يه ايكى وكالتنامه گوندردم. بوراده بڭا شدّتلى بر تجريد و تضييق ويريلديگنه مراق ايتمه‌يڭز؛ عنايتِ ربّانيه دوام ايدييور.
    مدارِ عبرتدر كه، بوراده رسالۀِ نور سربست اوقونوب يازيليركن (خلافِ عادت) باشده بو قيش، ياز گبى گيتديگنى چوق آدملردن ايشيتدم. نه وقت بڭا و رسالۀِ نوره هجوم ايديلدى، يازديريلمادى، تعطيل اولدى؛ غايت شدّتلى بر قيش باشلاديغى گبى، آفيونه شكوا صورتنده يازيلان حسبحال و زلزله‌لرى رسالۀِ نورڭ تعطيليله مناسبتدار گوسترديگى جهتنى اينانميانلره گويا اينانديرمق ايچون عين تعرّض زماننده باشلايوب شيمدى‌يه قدر آرا صيره خفيفجه صارصار، ايقاظ ايدييور دييه ايشيتدم.
    هم نه وقت رسالۀِ نوره ايليشيلمشسه، بر نوع عمومى قورقو باشلامش گورويورز. ديمك بو وطنڭ بلالردن محافظه‌سى ايچون رسالۀِ نور بر قطعى وسيله‌در. مادام بويله‌در، ملّت و وطنى سَونلر رسالۀِ نورى سربست بيراقسينلر و اوقوسونلر و اوقوتسونلر.
    إعاشه ايچون تخصيصاتلرندن، يالڭز مصرف بورجلرى ويرمك ايچون بر تك دفعه سكز گونلك تعييناتى قبول ايتدم، داها ايسته‌مم ديدم.
❊ ❊ ❊
    عزيز، صدّيق تام متين قارداشلرم!
    شهيد مرحومڭ برزخده اوقوماسيله مسرورانه مشغول اولديغى نور رساله‌لرينى دنياده كندى يرنده چاليشمق و بنى ده چاليشديرمق ايچون يازيلمشلر گبى تام وقتنده يتيشدى و مدرسۀِ يوسفيه‌نڭ اوچ طاتلى ميوه‌سنى و قرآنڭ قدسى و فردوسى بيڭلر ميوه‌لر ويرن اوچ حزبنى برابر گتيردى.