أوّلا: صوڭ پارچه‌ده، باشده {بِالْعُرْوَةِ الْوُثْقٰى} بيڭ اوچيوز قرق درت (١٣٤٤)  سهودر.  أگر  اوقونميان  ايكى  همزه  و  مدّه  صاييلمازلرسه  سهو  دگل؛  هم چوق معنيداردر. طوغريسى ١٣٤٧ در كه، پارچه‌نڭ آخرنده تكرار طوغرى يازيلمش. هم  باقى  قالان  قسمى  هم  أهمّيتلى،  هم  دنيايه  باقديغى  ايچون  و  ”عَلَقْ“ده‌كى   {اِنَّ اْلاِنْسَانَ لَيَطْغٰى} او پارچه‌ده‌كى طاغوته باقديغندن شيمديلك يازديريلمادى.
    و ثانيًا: فهرسته‌ده آيتِ حسبيه اولان دردنجى شعاعڭ فهرسته‌سى، إختيار لمعه‌سنڭ اون دردنجى رجاسى يرنده يازيلسين. حقيقةً مناسب گورونويور، تام بر رجادر.
    ثالثًا: يگرمى سكزنجى لمعه‌نڭ يگرمى سكزنجى نكته‌سنڭ عينى (فهرسته‌سى دگل)، اون بشنجى سوزڭ آخرنده يازيلسين. چونكه ايكيسى عين حقيقتدن بحث ايدييور.
    رابعًا: مرحوم حافظ على‌نڭ لمعه‌لرينى تصحيح ايتدم. ياقينده إن شاء اﷲ گوندريله‌جك.
    بوگونلرده مبارك قهرمانلرڭ فردوسى و يوسفى ميوه‌لرينى تصحيح ايدركن او رساله بڭا او درجه قوّتلى و قيمتلى گوروندى كه، باغيره‌رق ديدم: بتون چكديگمز حپس صيقنتيلرى يوز مِثلى زياده اولسه ده، ينه بو ميوه رساله‌سى، يوز درجه داها فضله ايش گورمش. أڭ معنّدلرى ده ايمانه گتيره‌رك گنيش دائره‌لرده كندينى ذوقله اوقوتديرييور.
    أى بڭا صيقنتى ويرن بدبختلر! بڭا نه ياپارسه‌ڭز ياپڭز، بش پاره ويرمم. باشمزه نه گلسه اوجوزدر، عينِ عنايتدر و محضِ رحمتدر، دييه تام تسلّى بولدم.
    عموم رسالۀِ نور طلبه‌لرينه سلام و سلامتلرينه دعا ايدرز.
سعيد النورسى