هيئتِ وكيله‌يه و ملّت‌وكيللرى رياستنه جزئى فقط أهمّيتلى
بر معروضاتمدر.
    اوتوز سنه‌دن بَرى حياتِ سياسيه‌دن چكيلديگم حالده، بو صيره‌ده بر دفعه‌يه مخصوص اولارق، وطنى و ملّى و آسايشى بر مسئله‌يى بيان ايدييورم. شويله كه:
    چوق أماره‌لرله قطعى قناعتمز گلدى كه؛ آنارشيلك حسابنه بڭا و بو أميرطاغ قصبه‌سنه و طولاييسيله بو وطنه بر سوءِ قصد وار كه، بر حبّه‌يى قبّه‌لر و بر سينك قنادى قدر أهمّيتى اولميان بر حادثه‌يى طاغ گبى گوستروب، سكونته محتاج اولان بو وطنده بنى بهانه ايدوب، آنارشيلك حسابنه و بر أجنبى پلانيله بزه، يعنى بيچاره وطنداشلريمزى إعدامِ أبديدن و شبهاتِ اُخرويه‌دن قورتارمغه چاليشان نور شاكردلرينه، بتون بتون قانونسز و كيفى هجوم ايديلدى. پك ظاهر بر غرض ايله، أوهام يوزندن، باروته آتش آتمق گبى، بو وطنه و آسايشه بنى بهانه ايدوب سوءِ قصد ايديلدى. شويله كه:
    اوچ محكمه، يگرمى سنه‌لك مكتوبلريمى و كتابلريمى و حاللريمى اينجه‌دن اينجه‌يه تدقيقدن صوڭره، بزه و كتابلريمه برائت ويرديگى حالده؛ و اوچ سنه‌دن بَرى تأليفاتى ترك ايتديگم و هفته‌ده آنجق بر مكتوب يازه‌بيلديگم و مجبور اولمادن، هر برى بر گون نوبتله ضرورى خدمتمى ياپان اوچ درت ترزى چيراغندن باشقه كيمسه‌يى قبول ايتمديگم حالده و سربستيت ويريلديگى و مملكتمه گيتمديگم حالده، هيچ عمرمده گورمه‌ديگم بر طرزده و رسمى بر صورتده بنى حدّته گتيروب بر حادثه چيقارمق ايچون، تحقير و إهانت قصديله، قانونسز و غرضله، بنى تحرّى ايله قپومڭ كيليدينى قيروب، قرآنمى و عربى لوحه‌لريمى أوراقِ مضرّه گبى آلوب گوتورمكله برابر، عدليه‌نڭ مهمّ بر مأمورى، رسمًا بوراده‌كى مأمورلره آمرانه ديمش كه: ”سعيدى ايكى ژاندارمه ايله تشهير صورتنده چيقاروب، زورله باشنه شاپقه گيديروب، اويله‌جه إفاده‌يه گتيرملى ايديڭز. هم اوڭا ياناشانلرى طوتيڭز.“ دييه، أهمّيتلى بر مجلسده و عينِ حقيقت اولان إفاده‌مى اوقودقلرى وقت سويله‌مش. بونده شكّ و شبهه قالمادى كه؛ بنى تحقير و إهانت ايدوب، حدّته گتيروب، آسايشى بوزمق غرضى تعقيب ايديلييور.