جنابِ حقّه حدسز شكر اولسون كه: بيڭلر حيثيت و شرفمى بو وطنده‌كى بيچاره‌لرڭ إستراحتنه و اونلردن بلالرڭ دفعنه فدا ايتمك ايچون بڭا بر حالتِ روحيه‌يى إحسان أيله‌مش كه؛ بن ده، اونلرڭ ياپديغى و نيّتنده بولوندقلرى تحقيرات و إهانتلره قارشى تحمّله قرار ويرمشم. بو ملّتڭ آسايشنه، خصوصًا معصوم چوجقلرڭ و محترم إختيارلرڭ و بيچاره خسته‌لرڭ و فقيرلرڭ دنيوى إستراحتلرينه و اُخروى سعادتلرينه بيڭلر حياتمى و بيڭلر شرفمى فدا ايتمگه حاضرم.
    ايشته سينك قنادينى طاغ گبى ياپدقلرينڭ بر أماره‌سى شو كه؛ بنم گبى غربتده، خسته، إختيار، ضعيف، تك باشنه بولونان بر آدم ايچون، اون گون ظرفنده بش دفعه آفيون واليسى و أمنيت مديرى و ايكى دفعه آفيون مدّعى عموميسى بنم ايچون بورايه گلمه‌سى و ايكى گونده، هر بر گونده بش طيّاره بنم گزديگم يرلرده بنى نظارت آلتنه آلماسى و بش پوليس خفيه‌سنڭ بوراده بڭا ترصّد ايدنلره علاوه ايديلوب، أحوالمى تجسّس ايتمك ايچون گوندريلمه‌سى و پوسته‌خانه‌لره، بڭا عائد مكتوبلرڭ مصادره‌سى ايچون رسمًا أمر ويريلمسى گوسترييور كه؛ شيخ سعيد و منمن حادثه‌سنڭ اون مِثلى بر حادثه‌يى أوهامله دوشونمشلر. حبّه‌يى قبّه سويله‌مشلر كه، بويله بر وضعيت آلييورلر. بنم أسكى حياتمى ظن ايدوب، إهانتله حدّته گله‌جك تخمين ايتمشلر. بِالعكس آلدانديلر. بز، بتون قوّتمزله آنارشيلگه بر سدِّ ذو القرنيْن گبى بر سدِّ قرآنى تأسيسنه چاليشييورز. بزه ايليشنلر، آنارشيلك و بلكه قومونيستلگه زمين إحضار ايدييورلر.