أوت محكمه‌جه دعوا ايتديگم و بنمله مناسبتدار بتون دوستلريمڭ تصديقى آلتنده، يگرمى سنه‌دن بَرى هيچ بر غزته‌يى اوقوميان، ديڭله‌مه‌ين و بو قدر محتاج اولديغى حالده إستراحتى ايچون هيچ مراجعت ايتمه‌ين و اون سنه‌دن بَرى حكومتڭ أركانلرينى (بر قاچى مستثنا اولارق) بيلمه‌ين و درت سنه‌دن بَرى دنيا حربندن و حادثاتندن هيچ خبر آلميان و مراق ايتمه‌ين بو بيچاره مظلوم سعيد، هيچ إمكانى وار مى كه، أهلِ سياستله اوغراشسين و إداره‌يه ايليشسين و آسايشڭ إخلالنه مَيلى بولونسون؟ أگر ذرّه مقدار بولونسه ايدى؛ ”قارشيمده كيملر وار، دنياده نه‌لر اولويور، بڭا كيم يارديم ايده‌جك؟“ دييه صوروشديراجقدى، مراق ايده‌جكدى، قاريشه‌جقدى، حيله‌لرله بيوكلره حلول ايده‌جكدى.
    أڭ أليم جزئى بر حادثه شودر كه: ”بر تجريدِ مطلق ايچنده هر مخابره‌دن كسيلمش وضعيتمدن قورتولمق ايچون حپسه گيرمگه بر بهانه بولڭز كه؛ بنى حپسه آلسينلر، بو عذابدن قورتولايم“ دييه بعض دوستلريمه بر گيزلى مكتوب ألدن گوندرمشدم. تا، بنم حياتمڭ سرمايه‌سى و نتيجه‌سى و غايت زينتلى بر صورتده تزيين ايديلمش رسالۀِ نوردن، دڭزليده محكمه‌ده بولونان كتابلريمه ياقين اولايم و تسليم آلمغه چاليشه‌يم. مع التأسّف عليهمه اولان اوراده‌كى أهلِ وقوفدن بر تك آدم بنى مدافعه ايدركن، او دخى مكتوبمى گوروب، حپسه گيرمه‌م ايچون عليهمه حكم ويرمگه مجبور اولمش.
    بنى حپسلره صوقان معارضلريمڭ بر بهانه‌لرى ده (او محكمه‌ده اوندن برائت قزانديغم) ”طريقتجيلق“در. حالبوكه رسالۀِ نورده دائما دعوا ايدوب ديمشم: ”زمان طريقت زمانى دگل، بلكه ايمانى قورتارمق زمانيدر. طريقتسز جنّته گيدنلر چوقدر، ايمانسز جنّته گيدن يوقدر.“ دييه بتون قوّتمزله ايمانه چاليشمشز. بن خواجه‌يم، شيخ دگلم. دنياده بر خانه‌م يوق كه، نره‌ده تكيه‌م اولاجق؟ بو يگرمى سنه ظرفنده، بر تك آدم يوق كه؛ چيقسين ديسين: ”بڭا طريقت درسى ويرمش.“ و محكمه‌لر و ضابطه‌لر بولمامشلر. يالڭز أسكيدن يازديغم طريقتلرڭ حقيقتلرينى علمًا بيان ايدن تلويحات رساله‌سى وار كه، بر درسِ حقيقتدر و يوكسك بر درسِ علميدر، طريقت درسى دگلدر. حرّيتِ وجدانى أساس طوتان حكومتِ جمهوريه‌نڭ، ألبته بو ملّتڭ ميليارلر أجدادينڭ روحلرى باغلانديغى بر حقيقته و اونڭ يولنده دنيايه ميدان اوقودقلرى و ايمانِ تحقيقى‌يى غالبانه فلسفه‌يه قارشى إثبات ايدن بر أثرى و خادملرينى حمايه ايتمك، أهمّيتلى بر وظيفه‌سيدر. يوقسه او ضعيف خادمڭ أللرينى باغلايوب، بيڭلر دشمنلرينى اوڭا صالديرتمغه، هيچ بر وجهله او جمهوريتڭ دستورلرى مساعده ايتمز. جمهوريت بنى ديڭله‌يه‌جك دييه شكوامى يازدم. أوت {حَسْبُنَا اﷲُ وَنِعْمَ الْوَكِيلُ} ديرم.