بِاسْمِهِ سُبْحَانَهُ
بڭا خدمت ايدن كوچوجك بر رسالۀِ النور طلبه‌سنڭ چوقلر نامنه صورديغى سؤالنه جوابدر.
    سؤال: استادم، ياغمور دعاسى و نمازڭ نتيجه‌سى گورونمدى، فائده‌سز قالدى؛ ايكى اوچ دفعه بلوط طوپلاندى، ياغمور ويرمه‌دن طاغيلدى. نه‌دن؟
    الجواب: ياغمورسزلق، بو چشيد دعا و نمازڭ وقتيدر، علّتى و حكمتى دگل. ناصلكه گونش و آيڭ طوتولماسى زماننده كسوف و خسوف نمازى قيلينير و گونشڭ غروبيله آقشام نمازى قيلينير؛ اويله ده ياغمورسزلق، قوراقلق، ياغمور نمازينڭ و دعاسنڭ وقتيدر. عبادت و دعانڭ سببى و نتيجه‌سى، أمر و رضاءِ إلٰهيدر؛ فائده‌سى، اُخرويدر. أگر نمازدن، عبادتدن دنيوى مقصدلر نيّت ايديلسه، يالڭز اونلر ايچون ياپيلسه، او نماز بطّال اولور. مثلا: آقشام نمازى گونشڭ باتمه‌مسى ايچون و خسوف نمازى آيڭ آچيلمه‌سى ايچون قيلنماز. اويله ده: بو نوع عبادت، ياغمورى گتيرمك ايچون قيلنسه، ياڭليش اولور. ياغمورى ويرمك، جنابِ حقّڭ وظيفه‌سيدر. بز وظيفه‌‌مزى ياپدق، اونڭ وظيفه‌سنه قاريشمايز. گرچه ياغمور نمازينڭ ظاهر نتيجه‌سى ياغمورڭ گلمه‌سيدر، فقط أصل حقيقى، أڭ منفعتلى نتيجه‌سى و أڭ گوزل و طاتلى ميوه‌سى شودر كه: هركس او وضعيتله آڭلار كه، اونڭ تعييننى ويرن، باباسى، خانه‌سى، دكّانى دگل؛ بلكه اونڭ تعييننى و يمگنى ويرن، قوجه بلوطلرى سونگر گبى و زمين يوزينى بر تارلا گبى تصرّفنده بولونديران بر ذات، اونى بسله‌يور، رزقنى ويرييور. حتّى أڭ كوچوجك بر چوجق ده (دائما آج اولديغى وقت والده‌سنه يالوارمغه آليشمشكن) او ياغمور دعاسنده كوچوجك فكرنده بيوك و گنيش بو معنايى آڭلار كه: بو دنيايى بر خانه گبى إداره ايدن بر ذات؛ هم بنى، هم بو چوجقلرى، هم والده‌لريمزى بسله‌يور، رزقلرينى ويرييور. او ويرمسه، باشقه‌لرينڭ فائده‌سى اولماز. اويله ايسه اوڭا يالوارمالى‌يز دير، تام ايمانلى بر چوجق اولور. بو مناسبتله قيصه‌جق آلتى نقطه بيان ايديله‌جك.