آلتنجى نقطه: ياغمورسزلق بر مصيبتدر و جزاىِ عمل بر عذابدر. بوڭا قارشى آغلامقله و حزن و كدرله، نياز و حزينانه يالوارمقله و پك جدّى ندامت و توبه و إستغفار ايله قارشيلامق و سنّتِ سنيه دائره‌سنده، بدعه‌لر قاريشمادن، شرائطڭ تعيين ايتديگى طرزده درگاهِ إلٰهيه‌يه إلتجا ايتمك و دعا و او حاله مخصوص عبوديتله مقابله ايتمكدر.
    هم بويله عمومى مصيبتلر، أكثر ناسڭ خطاسندن گلديگى جهتله، او إنسانلرڭ أكثرى، (قسمِ أعظمى) توبه و ندامت و إستغفار ايتمكله دفع اولور.
    بز رسالۀِ نور شاكردلرى دنيايه چوق أهمّيت ويرمديگمزدن، دنيايه يالڭز رسالۀِ نور ايچون باقديغمزدن، بو ياغمورسزلقده دخى او نقطه‌دن باقييورز. ايشته دڭزليده محكمه‌يه ويريلن جزئى بر قسم رسالۀِ نور، صاحبلرينه إعاده‌سنڭ عين زماننده، بوراده دخى بر قسم ذاتلر يازمغه باشلامالرى عين وقتنده، بو ياغمورسزلقده بر درجه رحمت ياغدى؛ فقط رسالۀِ نورڭ سربستيتى جزئى اولماسندن، رحمت دخى جزئى قالدى. إن شاء اﷲ ياقينده بنم ده رساله‌لرم إعاده ايديله‌جك، تام سربست و إنتشارى كلّيلشه‌جك و رحمت دخى تام اولاجق.
❊ ❊ ❊