عزيز، صدّيق قارداشلرم!
    حزب القرآن المعظّمڭ هم فوق العاده أهمّيتى، هم فائده‌لرى؛ هم اوقوماسنده هيچ بر وسوسه‌نڭ گلمه‌مسى، هم بتون قرآنڭ أڭ ثوابلى آيتلرينڭ إحتواسى، هم رسائلِ نوريه‌نڭ بتون أساسلرينى و حقيقتلرينى جمع ايتمسى، هم هركسه، خصوصًا هر وقت بتون قرآنى اوقومغه فرصت بولاميان و حافظ اولميانلره تمام قرآنڭ بر نمونۀِ قدسيسى؛ هم تمام قرآنڭ توافقلى طبعنده بر مثالِ مصغّرى و مژده‌جيسى؛ هم مادّى و لفظى و معنوى پارلاق بر إعجاز گوسترمسى گبى، پك چوق خاصيتلرى وار و بو شهورِ مباركه‌ده‌كى پك چوق بركتلره و نورلره و ثوابلره مداردر و اونڭ طبعنه و نشرينه چاليشمشلره چوق بيوك خيرلر قزانديرر. رسالۀِ نورڭ ايكى پارلاق و قدسى إستناد نقطه‌سى و آبِ حيات چشمه‌سى  اولان  {شَهِدَ  اﷲُ  اَنَّهُ  لاَ  اِلٰهَ  اِلاَّ  هُوَ  وَالْمَلٰئِكَةُ}  الخ...  آيتيله  {قُلِ اللّٰهُمَّ مَالِكَ الْمُلْكِ} الخ... آيتى، هر ناصلسه سهوًا سورۀِ آلِ عمراندن آلينان آيتلرده يازيلمامشلر. او ايكى آيتى ده يازوب ايچنه قوييڭز. بوگونلرده اون ايكنجى صحيفه‌يى اوقوركن بردن {اِنَّ الْمُنَافِقِينَ فِى الدَّرْكِ اْلاَسْفَلِ مِنَ النَّارِ} آيتى گوزيمه ايليشدى. ماقبلنه باقدم، {وَمَنْ اَحْسَنُ دِينًا مِمَّنْ اَسْلَمَ وَجْهَهُ ِﷲِ} الخ... گوردم. آرقه صحيفه‌سنه باقدم، گوردم كه؛ رسالۀِ نوره إشارت ايدن درت آيت وار و اونلر برنجى شعاعده ايضاح ايديلمش. قلبمه گلدى: هر حالده بو دهشتلى آيت، بو دهشتلى و ظلماتلى و نفاقى قوّتلى عصريمزه ده خصوصى باقار. دقّت ايتدم، قناعتم گلدى. بر أماره‌سى شودر كه: {اِنَّ الْمُنَافِقِينَ فِى الدَّرْكِ اْلاَسْفَلِ مِنَ النَّارِ} جفر و أبجد حسابيله، تام تامنه نفاقڭ درت مرتبه‌سنڭ تاريخلرينه توافق ايله پارمق باصييور. شويله كه:
    شدّه‌لر صاييلير، أگر اوقونميان همزه‌لر و {فِى} ده‌كى اوقونميان {ى} صاييلمازسه، تام تامنه (١٣٦٢) ايده‌رك بو سنه‌يه پارمق باصار. أگر {مِنَ النَّارِ} ده‌كى شدّه بر نون بر لامِ أصلى حساب اولسه (١٣٤٢) ايده‌رك برنجى حربِ عمومينڭ دهشتلى نفاقلرى نتيجه ويرن تاريخنه تام تامنه توافقله خبر ويرر. أگر شدّه ايكى نون صاييلسه، اوقونميان همزه‌لر و (ى) ده صاييلسه (١٣٧٦) ايده‌رك، بو ظلماتلى نفاقڭ سقوط مرتبه‌سنه و چوق آيتلرده ”نور“ ايله قارشيلاشديريلان {اَلظُّلُمَاتِ} كلمه‌سنڭ مقامِ جفريسى اولان (١٣٧٢) يه درت فرقله توافق ايده‌رك خبر ويرر. أگر اوقونميانلر صاييلسه و {النَّارِ} ده‌كى شدّه لامِ أصلى اولسه، تام تامنه (١٣٥٦) ايده‌رك كفر و نفاقڭ دهشتلى فورطنه‌لرينڭ تاريخنه توافقله پارمق باصار گوردم.
    أوت، ايكى ”ر“ (٤٠٠)؛ اوچ ”ف“، ايكى ”ل“ (٣٠٠)؛ بر ”ق“، ايكى شدّه‌لى ”ن“لر (٣٠٠)؛ بر ”م“ بر ”س“ (١٠٠)؛ ديگر ”م“، بر ”ى“، بر ”ن“ او ده (١٠٠)، ايكى ”ن“ او ده (١٠٠)؛ يكونى (١٣٠٠). بر ”ل“، بر ”ك“ (٥٠)، شدّه‌لى ”د“ (٨) و ايكى ”مدّه“، ايكى ”همزه“ (٤)؛ مجموعى (١٣٦٢) ايدر. اوته‌كى اوچ عددى ده قياس ايديلسين.