ايشته بو حقيقته بناءً أڭ بختيار چوجقلر اونلردر كه؛ رسالۀِ النور دائره‌سنه گيروب دنياده پدر و والده‌سنه حرمت و خدمت و حسناتى ايله اونلرڭ دفترِ أعمالنه وفاتلرندن صوڭره حسناتى يازديرمقله و آخرتده اونلره درجه‌سنه گوره شفاعت ايتمكله بختيار أولاد اولورلر.
    رسالۀِ النورڭ ايكنجى قسم طلبه‌لرى: فطرةً رسالۀِ النوره محتاج، بر درجه ده دنيادن اوركمش وياخود كوسمش قادينلردر. خصوصًا بر درجه ياشلى ده اولسه، رسالۀِ النور اوڭا حقيقى بر غداىِ معنويدر. چونكه رسالۀِ النورڭ درت أساسندن بريسى شفقتدر كه، إسمِ رحيمڭ مظهريتندن گلمش. قادينلرڭ ده أڭ أساسلى خاصّه‌لرى و فطرى وظيفه‌لرينڭ مايه‌سى، شفقتدر.
    اوچنجى قسم: فطرى اولماسه ده، وضعيتى إعتباريله رسالۀِ النوره أكمك و علاج گبى محتاج اولان خسته‌لر و إختيارلردر. چونكه رسالۀِ النور حياتِ باقيه‌يى گونش گبى گوسترديگندن و دنيوى حياتڭ فانيلك جهتنده ماهيتنى تام گوسترديگندن؛ دنيوى حياتلرينه يا خسته‌لق ويا إختيارلقله ضربه گلن و غفلت ويا ضلالت جهتيله ئولومى إعدام توهّم ايدن خسته‌لر و إختيارلر رسالۀِ النوره او درجه محتاجدرلر و اويله بر تسلّى، بر نور آليرلر كه؛ اونلرڭ خسته‌لق و إختيارلغنى صحّت و گنجلگه ترجيح ايتديرييور.
    إخطار ايديلن ايكنجى نقطه: مادام عربيجه آلتمش درده گيردك، إشارتِ غيبيه گلمه‌سيله رسالۀِ النور تكمّل ايتمش اولور. أگر رومى تاريخى اولسه، داها ايكى سنه‌مز وار. حالبوكه چوق مهمّ يرده يازيلميان و تأخير ايديلن رساله‌لر قالمش. مثلا: اوتوزنجى مكتوب و اوتوز ايكنجى مكتوب و اوتوز ايكنجى لمعه‌لر گبى أهمّيتلى مرتبه‌لر بوش قالمش. قلبمه إخطار ايديلمش كه: أسكى سعيدڭ أڭ مهمّ أثرى و رسالۀِ النورڭ فاتحه‌سى، عربى و مطبوع اولان إشارات الإعجاز تفسيرى، اوتوزنجى مكتوب اولاجق و اولمش. أسكى سعيدڭ أڭ صوڭ تأليفى و يگرمى گون رمضانده تأليف ايديلن، كندى كندينه منظوم گلن لمعات رساله‌سى، اوتوز ايكنجى لمعه اولماسى و يڭى سعيدڭ أڭ أوّل حقيقتدن شهود درجه‌سنده قلبنه ظاهر اولان و عربى عباره‌سنده قطره، حبّه، شمّه، ذرّه، حباب، زهره، شعله و اونلرڭ ذيللرندن عبارت بيوكجه بر مجموعه اوتوز اوچنجى لمعه اولماسى إخطار ايديلدى. هم ”ميوه“ اون برنجى شعاع اولديغى گبى، دڭزلى مدافعه‌نامه‌سى ده، اون ايكنجى شعاع و حپسده و صوڭره كوچك مكتوبلر مجموعه‌سى اون اوچنجى شعاع اولماسى إخطار ايديلدى. بن ده عزيز قارداشلريمڭ تنسيبلرينه حواله ايدييورم. ديمك بر قاچ مرتبه‌ده قپو آچيقدر، بزلره داها ايى تتمّه‌لر يازديريله‌بيلير.