عزيز، صدّيق قارداشلرم!
    سؤال: ”توافقله بو كرامت ناصل قطعى ثابت اولويور؟“ دييه قارداشلريمزدن بريسنڭ سؤالنه كوچك جوابدر.
    الجواب: بر شيده توافق اولسه، كوچك بر أماره اولور كه؛ اونده بر قصد وار؛ بر إراده وار؛ راست گله بر تصادف دگل. و بِالخاصّه توافق بر قاچ جهتده اولسه، او أماره تام قوّتلشير. و بِالخاصّه يوز إحتمال ايچنده ايكى شيئه مخصوص و او ايكى شى بربريله تام مناسبتدار اولسه، او توافقدن گلن إشارت صريح بر دلالت حكمنه گچر كه؛ بر قصد و إراده ايله و بر مقصد ايچون او توافق اولمش، تصادفڭ إحتمالى يوق.
    ايشته بو مسئلۀِ معراجيه ده عينًا بويله اولدى. طقسان طوقوز گون ايچنده يالڭز ليلۀِ رغائب و ليلۀِ معراجه ياغمور رحمتنڭ توافقى و او ايكى گيجه و گونه مخصوص اولماسى، داها أوّل و داها صوڭره اولمامسى و إحتياجِ شديدڭ تام وقتنه موافقتى و معراجيه رساله‌سنڭ بوراده چوقلر طرفندن شوق ايله قرائت و كتابت و نشرينه راست گلمسى و او ايكى مبارك گيجه‌نڭ بربريله بر قاچ جهتده توافق ايتمه‌سى و موسمى اولماديغى ايچون عجيب گورولتيلرله، سويلنميه‌جك مادّى معنوى زمين گورولتيلريله فريادلرينه تهديدكارانه و تسلّيدارانه توافق ايتمه‌سى و أهلِ ايمانڭ مأيوسيتندن تسلّى آرامالرينه و ضلالتڭ صولتندن گلن وسوسه و ضعفيتنه قارشى قوّۀِ معنويه‌نڭ تقويه‌سنى ايسته‌ملرينه تام توافقى، بو گيجه‌لر گبى شعائرِ إسلاميه‌يه قارشى حرمتسزلك ايدنلرڭ خطالرينه بر تكدير اولارق، ”كائنات بو گيجه‌لره حرمت ايدر، نه‌دن سز ايتمييورسڭز؟“ دييه معناسنده، كثرتلى رحمتله شعائرِ إسلاميه‌يه قارشى، حتّى سماوات و فضاىِ عالم حرمتلرينى گوسترمكله توافق ايتمه‌سى، ذرّه مقدار إنصافى اولان بيلير كه؛ بو ايشده خصوصى بر قصد و إراده و أهلِ ايمانه خصوصى بر عنايت و مرحمتدر، هيچ بر جهتله تصادف إحتمالى اولاماز. ديمك حقيقتِ معراج، بر معجزۀِ أحمديه (ع‌ص‌م) و كرامتِ كبراسى اولديغى و معراج نردبانى ايله گوكلره چيقماسى ايله ذاتِ أحمديه‌نڭ (ع‌ص‌م) سماوات أهلنه أهمّيتنى و قيمتنى گوسترديگى گبى؛ بو سنه‌كى معراج ده زمينه و بو مملكت أهاليسنه كائناتجه حرمتنى و قيمتنى گوستروب بر كرامت گوستردى.