هم مثلا: فرض نمازينى قيلميان و وظيفۀِ عبوديتى يرينه گتيرمه‌ين بر آدمڭ كوچك بر آمرندن كوچك بر وظيفه‌سزلك يوزندن آلديغى تكديردن متأثّر اولان او آدم، سلطانِ أزل و أبدڭ مكرّر أمرلرينه قارشى فرضنده ياپديغى بر تنبللك، بيوك بر صيقنتى ويرييور و او صيقنتيدن آرزو ايدييور و معنًا دييور كه: ”كاشكه او وظيفۀِ عبوديتى بولونماسه ايدى.“ و بو آرزودن بر معنوى عداوتِ إلٰهيه‌يى إشمام ايدن بر إنكار آرزوسى اويانير. بر شبهه، وجودِ إلٰهيه‌يه دائر قلبه گلسه، قطعى بر دليل گبى اوڭا ياپيشمغه مَيل ايدر. بيوك بر هلاكت قپوسى اوڭا آچيلير. او بدبخت بيلمييور كه: إنكار واسطه‌سيله، غايت جزئى بر صيقنتى وظيفۀِ عبوديتدن گلمگه مقابل، إنكارده ميليونلر ايله او صيقنتيدن داها مدهش معنوى صيقنتيلره كندينى هدف ايدر. سينگڭ ايصيرماسندن قاچوب، ييلانڭ ايصيرماسنى قبول ايدر. و هكذا.. بو اوچ مثاله قياس ايديلسين كه {بَلْ رَانَ عَلٰى قُلُوبِهِمْ} سرّى آڭلاشيلسين.

ايكنجى نكته: يگرمى آلتنجى سوزده سرِّ قدره دائر بيان ايديلديگى گبى، مصيبت و خسته‌لقلرده إنسانلرڭ شكوايه اوچ وجهله حقلرى يوقدر.

برنجى وجه: جنابِ حق، إنسانه گيديرديگى وجود لباسنى صنعتنه مظهر ايدييور. إنسانى بر موده‌ل ياپمش، او وجود لباسنى او موده‌ل اوستنده كسر، بيچر، تبديل ايدر، تغيير ايدر؛ مختلف أسماسنڭ جلوه‌سنى گوسترر. شافى إسمى خسته‌لغى ايستديگى گبى، رزّاق إسمى ده آجلغى إقتضا ايدييور. و هكذا... {مَالِكُ الْمُلْكِ يَتَصَرَّفُ فِى مُلْكِهِ كَيْفَ يَشَاءُ}