رسالۀِ نورڭ مصادره حادثه‌سى مناسبتيله إسپارطه سليمانى رشدينڭ،

أوّلكى فقره‌سنه ذيل اولارق يازديغى

بر فقره‌سيدر.

رسالۀِ نور شاكردلرينڭ مركزى اولان شكرى أفندينڭ كوشكنڭ قومشوسى سكسان ياشنده محترم عليل عثمان چاوش نامنده بر ذات، رسالۀِ نور ناشرلرينه هجوم زمانندن بر گون صوڭره رؤياسنده گورويور كه: گونش ايله قمر، برابر اولارق كوشكڭ ايچنه گيروب پارلايورلر.

ديگر بر رؤياده كچه‌جى مصطفى أفندينڭ حفيدى بكر ينه حادثۀِ أليمه‌دن بر ايكى گون صوڭره گورويور كه: گونش قبله طرفندن چيقييور. شعاعاتى ايچنده گونش يوزنده رسالۀِ نور ناشرينڭ صورتى تمثّل ايدوب، عينًا گونشڭ قُرْصنده گورونويور.

هم متديّن بر قادين، ينه حادثه‌دن صوڭره گورويور كه: سماواتدن مبارك كاغدلر ياغييور. صورويورلر: ”بو نه‌در؟“ رؤياده ديمشلر: ”رسالۀِ نورڭ صحيفه‌لريدر.“ يعنى، تعبيرجه رسالۀِ نور، قرآنڭ تفسيرى اولديغى جهتله، وحىِ سماوى اولان قرآنڭ سماوى و إلهامى بر تفسيريدر. هم ياغمور گبى، إنسانلره كثرتلى بر رحمتدر.

حادثه‌نڭ وقوعندن أوّل، رسالۀِ نور شاكردلرينڭ هر برى بر جسدڭ أعضالرى گبى، بر جهتده او جسده گلن مؤثّر بر عارضه‌يى بتون أعضانڭ حسّ ايتمه‌سى نوعندن؛ بو حادثه‌يى رسالۀِ نورڭ درت شاكردى، وقوعندن بر ايكى گون أوّل شويله گورديلر: اوچى، يعنى محمد زهدى، خليل روحى، محمد نيازى، رسالۀِ نور ناشرلرينڭ استادينى وفات ايتمش گورويورلر كه؛ وفات ايسه تعبيرجه رسالۀِ نورڭ تعطيلنى خبر ويرييور. دردنجيسى: فاضل بك گورويور كه: (حادثه‌دن بر گون أوّل) رافده كتابلرى قاريشديرر، بعض كتابلرى دوشورور. استاد بڭا حدّت ايدييور، بن ده دييورم: ”رأفت دوشوردى.“ بردن خانه‌يه پوليسلر طولويورلر، هر شيئى آلييورلر.