لمعه‌لر | سكزنجى لمعه | 114
(54-118)

مدارِ عبرت بر حادثه: رسالۀِ نور ناشرلرينڭ تضييقى يوزندن آمرلرينڭ ياننده يوز بولمق نيّتيله رسالۀِ نور ناشرلرينه ايليشنلرڭ عكسِ مقصديله طوقات ييدكلرينڭ يوز حادثه‌دن بر حادثه‌سى شودر كه:


سببسز، صِرف بعض غرضكارلرڭ كيفى ايچون رسالۀِ نور ناشرلرينه بر قولپ طاقوب محكمه‌لرده سورونديرمك و بلكه محو ايتمك ايچون صورةً كندينى دوست گوستروب غايت خائنانه بر رياكارلقله دائره‌مزه صوقولوب، بر طاقم يالانلرله آمرلرينى إغفال ايدوب رسالۀِ نور ناشرلرينه مدهش ضربه گلمه‌سنه وسيله اولان بر آدم؛ توجّه و مقام قزانمق دگل، بِالعكس اويله بر طوقات يدى كه، دنياده قالدقجه وجدانى وارسه وجدان عذابى چكديره‌جك. هم او قولاى وظيفه‌سندن مشكل بر وظيفه‌يه تحويل ايتديلر و هم ده اوڭا يالانجى نظريله باقديلر. و هم نفرتِ عامّه‌يى قزاندى. و هم تحرّى حادثه‌‌سندن ايكى گون صوڭره بر إختيار آدمى خانه‌سندن چيقاروب يولده گتيرركن، او إختيار ذات فجئةً وفات ايدوب هم مسؤليتِ مادّيه‌يه و معنويه‌يه معروض قالمشدر.


أوت، رسالۀِ نوره هجوم ايدنلر، وقتيله كفننى بويننه طاقينمالى و رذالته بورونملى و معنوى جهنّمه دنياده گيرمگى گوزه آلمالى.


سس يوق

لمعه‌لر