لمعه‌لر | سكزنجى لمعه | 71
(54-118)
رسالۀِ نور شاكردلرينڭ بر فقره‌سيدر

وَكُنْ قَادِرِىَّ الْوَقْتِ ِﷲِ مُخْلِصًا ❊ تَعِيشُ سَعِيدًا صَادِقًا بِمُحَبَّتِى

علمِ جفر ايله معناسى: ”أى سعيد! سن، زمانڭ عبد القادرى اول، إخلاصِ تامّى قزان، فقرڭله برابر معيشتڭى دوشونمه، ناسدن منّت آلمه، إسمڭ ”سعيد“ اولديغى گبى معيشتده ده مسعود اولاجقسڭ! محبّتمده صادق اولديغڭدن و إخلاصه چاليشديغڭدن، خلوصى گبى مخلص طلبه‌لر و يارديمجيلر و سليمان، بكر گبى صادق خدمتكارلر و صبرى گبى تام تقدير ايديجى و جدّى مشتاق طلبه‌لر سزه ويريلمش.“ أوت ِﷲ الحمد، غوثڭ صراحت درجه‌سنده إخبار ايتديگى حال وقوع بولمشدر. غوثِ أعظم، ”سعيد“ ناميله تسميه ايتديگى مريدينڭ تاريخچۀِ حياتنده أڭ مهمّ نقطه‌لرى بيان ايتمكله برابر، علمِ جفر أسراريله سكز طوقوز جهتده سعيدڭ باشنه پارمغنى باصييور. بيتلرڭ معناىِ ظاهريسى ايله معانئِ جفريه‌سى بربرينه چوق ياقين اولمقله، طوقوز وجهده‌كى إشارتلر بربرينى تأييد ايتديگندن صراحت درجه‌سنه چيقمش.


اَنَا لِمُرِيدِى حَافِظًا مَا يَخَافُهُ ❊ وَاَحْرُسُهُ فِى كُلِّ شَرٍّ وَ فِتْنَةٍ

علمِ جفر ايله معناسى: ”اون دردنجى عصرده ”الْكُرْدى“ لقبيله ياد ايديلن ملا سعيد، بنم مريدمدر. او فتنه و بلا عصرينڭ هر شر و فتنه‌سندن، اللّٰهڭ إذنيله و حول قوّتيله اونڭ محافظى‌يم.“ أوت حرّيتدن يگرمى اوتوز سنه صوڭره‌يه قدر، يگرمى فتنۀِ عظيمه ايچنده فوق العاده بر صورتده غوثڭ او مريدى محفوظ قالمشدر. قورقديغى شر و مهالكدن بر حفظِ غيبى ايله قورتولمشدر.


سس يوق

لمعه‌لر