لمعه‌لر | اون دردنجى لمعه | 214
(209-227)

ايشته بو وجهله رسولِ أكرم عليه الصلاة والسلام، سابقًا ذكر ايتديگمز گبى بر دفعه {عَلَى الثَّوْرِ}، بر دفعه {عَلَى الْحُوتِ} ديمش. أوت معجز البيان اولان لسانِ نبوّته ياقيشير بر طرزده غايت درين و چوق عصر صوڭره آڭلاشيلاجق بر حقيقته إشارةً بر دفعه {عَلَى الثَّوْرِ} ديمش. چونكه كُرۀِ أرض، او سؤالڭ زماننده ثَوْر برجنڭ مثالنده ايدى. بر آى صوڭره ينه صورولمش، {عَلَى الْحُوتِ} ديمش. چونكه او وقت كُرۀِ أرض، حوت برجنڭ گولگه‌سنده ايمش.


ايشته إستقبالده آڭلاشيلاجق بو علوى حقيقته إشارةً و كُرۀِ أرضڭ وظيفه‌سنده‌كى حركتنه و سياحتنه ايماءً و سماوى برجلر، گونش إعتباريله معطّل و مسافرسز اولدقلرينه و حقيقى ايشله‌ين برجلر ايسه، كُرۀِ أرضڭ مدارِ سنويسنده بولونديغنه و او برجلرده وظيفه گورن و سياحت ايدن كُرۀِ أرض اولديغنه رمزًا {عَلَى الثَّوْرِ وَالْحُوتِ} ديمشدر. {وَاﷲُ اَعْلَمُ بِالصَّوَابِ}


بعض كتبِ إسلاميه‌ده ثَوْر و حوته دائر عجيب و خارجِ عقل حكايه‌لر، يا إسرائيلياتدر ويا تمثيلاتدر ويا بعض محدّثلرڭ تأويلاتيدر كه، بعض دقّتسزلر طرفندن حديث ظن ايديله‌رك رسولِ أكرم عليه الصلاة والسلامه إسناد ايديلمش.

سس يوق

لمعه‌لر