لمعه‌لر | اون دردنجى لمعه | 212
(209-227)

سنڭ سؤالڭ جوابنه شيمديلك ”اوچ وجه“ سويله‌نه‌جك.


برنجيسى: حَمَلۀِ عرش و سماوات دينيلن ملائكه‌نڭ برينڭ إسمى ”نَسِرْ“ و ديگرينڭ إسمى ”ثَوْر“ اولارق درت ملائكه‌يى، جنابِ حق عرش و سماواته سلطنتِ ربوبيتنه نظارت ايتمك ايچون تعيين ايتديگى گبى، سماواتڭ بر كوچك قارداشى و سيّاره‌لرڭ بر آرقداشى اولان كُرۀِ أرضه دخى ايكى مَلك، ناظر و حَمَله اولارق تعيين ايتمشدر. او مَلكلرڭ برينڭ إسمى ”ثَوْر“ و ديگرينڭ إسمى ”حوت“در. و او نامى ويرمه‌سنڭ سرّى شودر كه: أرض ايكى قسمدر: برى، صو؛ برى طوپراق. صو قسمنى شنلنديرن باليقدر. طوپراق قسمنى شنلنديرن، إنسانلرڭ مدارِ حياتى اولان زراعت، اوكوز ايله‌در و اوكوزڭ اوموزنده‌در. كُرۀِ أرضه مؤكّل ايكى مَلك، هم قوماندان، هم ناظر اولدقلرندن، ألبته باليق طائفه‌سنه و اوكوز نوعنه بر جهتِ مناسبتلرى بولونمق لازمدر. بلكه، {وَالْعِلْمُ عِنْدَ اﷲِ} او ايكى مَلگڭ عالمِ ملكوت و عالمِ مثالده ثَوْر و حوت صورتنده تمثّللرى وار. (حاشيه) ايشته بو مناسبته و او نظارته إشارةً و كُرۀِ أرضڭ او ايكى مهمّ نوع مخلوقاتنه ايماءً لسانِ معجز البيانِ نبوى، {َاْلاَرْضُ عَلَى الثَّوْرِ وَالْحُوتِ} ديمش، غايت درين و گنيش بر صحيفه قدر مسئله‌لرى حاوى اولان بر حقيقتى، غايت گوزل و قيصه بر تك جمله ايله إفاده ايتمش.


سس يوق

لمعه‌لر