ايكنجى وجه: مثلا ناصلكه دينيلسه: ”بو دولت و سلطنت هانگى شى اوزرنده طورييور؟“ جوابنده: {عَلَى السَّيْفِ وَ الْقَلَمِ} دينيلير. يعنى ”عسكر قلنجنڭ شجاعتنه، قوّتنه و مأمور قلمنڭ درايتنه و عدالتنه إستناد ايدر.“ اويله ده: كُرۀِ أرض مادام ذى‌حياتڭ مسكنيدر و ذى‌حياتڭ قوماندانلرى ده إنساندر و إنسانڭ أهلِ سواحل قسمنڭ قسمِ أعظمنڭ مدارِ تعيّشلرى باليقدر و أهلِ سواحل اولميان قسمنڭ مدارِ تعيّشلرى، زراعتله اوكوزڭ اوموزنده‌در و مهمّ بر مدارِ تجارتى ده باليقدر. ألبته دولت، سيف و قلم اوستنده طورديغى گبى؛ كُرۀِ أرض ده، اوكوز و باليق اوستنده طورييور دينيلير. زيرا نه وقت اوكوز چاليشمازسه و باليق ميليون يمورطه‌يى بردن طوغورمازسه، او وقت إنسان ياشايامز، حيات سقوط ايدر، خالقِ حكيم ده أرضى خراب ايدر.

ايشته رسولِ أكرم عليه الصلاة والسلام، غايت معجزانه و غايت علوى و غايت حكمتلى بر جواب ايله: {َاْلاَرْضُ عَلَى الثَّوْرِ وَالْحُوتِ} ديمش. نوعِ إنسانينڭ حياتى، نه قدر جنسِ حيوانينڭ حياتيله علاقه‌دار اولديغنه دائر گنيش بر حقيقتى، ايكى كلمه ايله درس ويرمش.

اوچنجى وجه: أسكى قوزموغرافيا نظرنده گونش گزر. گونشڭ هر اوتوز درجه‌سنى، بر برج تعبير ايتمشلر. او برجلرده‌كى ييلديزلرڭ آرالرنده بربرينه ربط ايده‌جك فرضى خطلر چكيلسه، بر تك وضعيت حاصل اولديغى وقت، بعض أسد (يعنى آرسلان) صورتنى، بعض ترازى معناسنه اولارق ميزان صورتنى، بعض اوكوز معناسنه ثَوْر صورتنى، بعض باليق معناسنه حوت صورتنى گوسترمشلر. او مناسبته بناءً او برجلره او إسملر ويريلمش. شو عصرڭ قوزموغرافياسى نظرنده ايسه، گونش گزمييور. او برجلر بوش و معطّل و ايشسز قالمشلر. گونشڭ بدلنه كُرۀِ أرض گزييور. اويله ايسه او بوش، ايشسز برجلر و يوقاريده‌كى معطّل دائره‌لر يرينه، يرده أرضڭ مدارِ سنويسنده كوچك مقياسده او دائره‌لرى تشكيل ايتمك گركدر. شو حالده بروجِ سماويه، أرضڭ مدارِ سنويسنده تمثّل ايده‌جك. و او حالده كُرۀِ أرض هر آيده بروجِ سماويه‌نڭ برينڭ گولگه‌سنده و مثالنده‌در. گويا أرضڭ مدارِ سنويسى بر آيينه حكمنده اولارق، سماوى برجلر اونده تمثّل ايدييور