ايشته بو إستحقاقى و مذكور حقيقتى إفاده ايتمك ايچون، قرآنِ معجز البيان معجزانه بر صورتده او شدّتلى طرزِ إفاده‌يى إختيار ايده‌رك، تام تامنه حقيقتِ بلاغت اولان مطابقِ مقتضاىِ حاله مطابقت ايدييور.

ايكنجى سؤال: طبيعتدن واز گچن و ايمانه گلن ذات دييور كه:

هر موجود، هر جهتده، هر ايشنده و هر شيئنده و هر شأننده مشيئتِ إلٰهيه‌يه و قدرتِ ربّانيه‌يه تابع اولماسى، چوق عظيم بر حقيقتدر. عظمتى جهتنده طار ذهنلريمزه صيقيشمييور. حالبوكه گوزيمزله گورديگمز بو نهايت درجه‌ده مبذوليت، هم خلقت و ايجادِ أشياده‌كى حدسز سهولت، هم سابق برهانلريڭزله تحقّق ايدن وحدت يولنده‌كى ايجادِ أشياده نهايت درجه‌ده قولايلق و سهولت، هم نصِّ قرآن ايله بيان ايديلن {مَا خَلْقُكُمْ وَلاَ بَعْثُكُمْ اِلاَّ كَنَفْسٍ وَاحِدَةٍ ❊ وَمَا اَمْرُ السَّاعَةِ اِلاَّ كَلَمْحِ الْبَصَرِ اَوْ هُوَ اَقْرَبُ} گبى آيتلرڭ صراحةً گوستردكلرى نهايت درجه‌ده قولايلق، او حقيقتِ عظيمه‌يى، أڭ مقبول و أڭ معقول بر مسئله اولديغنى گوسترييورلر. بو قولايلغڭ سرّى و حكمتى نه‌در؟

الجواب: يگرمنجى مكتوبڭ اوننجى كلمه‌سى اولان {وَهُوَ عَلٰى كُلِّ شَيْءٍ قَدِيرٌ} بياننده، او سرّ غايت واضح و قطعى و مقنع بر طرزده بيان ايديلمش. خصوصًا او مكتوبڭ ذيلنده داها زياده وضوح ايله إثبات ايديلمش كه؛ بتون موجودات، صانعِ واحده إسناد ايديلديگى وقت، بر تك موجود حكمنده قولايلاشير. أگر واحدِ أحده ويريلمزسه؛ بر تك مخلوقڭ ايجادى، بتون موجودات قدر مشكلله‌شير و بر چكردك، بر آغاج قدر صعوبتلى اولور. أگر صانعِ حقيقيسنه ويريلسه، كائنات بر آغاج گبى و آغاج بر چكردك گبى و جنّت بر بهار گبى و بهار بر چيچك گبى قولايلاشير، سهولت پيدا ايدر. و بِالمشاهده گورونن حدسز مبذوليت و اوجوزلغڭ و هر نوعڭ سهولتله كثرتِ أفرادى بولونماسنڭ و كثرتِ سهولت و سرعتله منتظم، صنعتلى، قيمتلى موجوداتڭ قولايجه وجوده گلمه‌سنڭ سرلرينه مدار اولان و حكمتلرينى گوسترن يوزر دليللرندن و باشقه رساله‌لرده تفصيلاً بيان ايديلن بر ايكيسنه مختصر بر إشارت ايدرز.