ايشته بو ايكى ذات، بنم إعتقادمجه، اون سنه‌لك بر تقوا ايله ألده ايديله‌جك بر قزانج قدر بر كار بولديلر. أگر ايكيسى، بر قسم گنجلر گبى صحّت و گنجلگنه گووه‌نوب، غفلت و سفاهته آتيلسه ايديلر؛ ئولوم ده اونلرى ترصّد ايدوب تام گناهلرينڭ پيسلكلرى ايچنده ياقالاسه ايدى؛ او نورلر دفينه‌سى يرينه، قبرلرينى عقربلر و ييلانلر يوواسى ياپاجقلردى.

مادام خسته‌لقلرڭ بويله منفعتى وار، اوندن شكوا دگل توكّل، صبر ايله، بلكه شكر ايدوب، رحمتِ إلٰهيه‌يه إعتماد ايتمكدر.

اون دردنجى دواء: أى گوزينه پرده گلن خسته! أگر أهلِ ايمانڭ گوزينه گلن پرده‌نڭ آلتنده ناصل بر نور و معنوى بر گوز اولديغنى بيلسه‌ڭ ”يوز بيڭ شكر ربِّ رحيممه“ ديرسڭ. بو مرهمى ايضاح ايچون بر حادثه سويله‌يه‌جگم. شويله كه: بڭا سكز سنه كمالِ صداقتله هيچ گوجنديرمه‌دن خدمت ايدن بارلالى سليمانڭ خاله‌سنڭ، بر وقت گوزى قپاندى. او صالحه قادين، بڭا قارشى حدّمدن يوز درجه فضله حسنِ ظن ايده‌رك، ”گوزيمڭ آچيلمه‌سى ايچون دعا ايت“ دييه‌رك، جامع قپوسنده بنى ياقالادى. بن ده، او مبارك و مجذوبه قادينڭ صلاحتنى دعامه شفاعتجى ياپوب، ”يا ربّى، اونڭ صلاحتى حرمتنه اونڭ گوزينى آچ“ دييه يالواردم. ايكنجى گون بوردورلى بر گوز حكيمى گلدى، گوزينى آچدى. قرق گون صوڭره ينه گوزى قپاندى. بن چوق متأثّر اولدم، چوق دعا ايتدم. إن شاء اﷲ او دعا، آخرتى ايچون قبول اولمشدر. يوقسه بنم او دعام، اونڭ حقّنده غايت ياڭليش بر بددعا اولوردى. چونكه أجلى قرق گون قالمشدى. قرق گون صوڭره (اﷲ رحمت ايتسين) وفات أيلدى.