اون آلتنجى رجا: بر زمان إختيارلق وقتنده، أسكيشهر حپسندن (بر سنه جزايى چكوب) چيقدم. بنى قسطمونى‌يه نفى ايتديلر. پوليس قره‌غولنده ايكى اوچ آى مسافر ايتديلر. بنم گبى صادق دوستلريله گوروشمكدن صيقيلان بر منزوى و قيافتنڭ تبديلنه تحمّل ايتمه‌ين بر آدم، بويله يرلرده نه قدر عذاب چكر آڭلاشيلير. ايشته بن بو مأيوسيتده ايكن، بردن عنايتِ إلٰهيه إختيارلغمڭ إمدادينه گلدى. او قره‌غولده‌كى قوميسر، پوليسلرله برابر صادق دوست حكمنه گچديلر. هيچ بر وقت شاپقه‌يى باشمه قويمايى إخطار ايتمدكلرى گبى؛ بنم خدمتجيلرم مِثللو، ايستديگم زمان بنى شهرڭ أطرافنده گزديرييورديلر. صوڭره او قره‌غولڭ قارشيسنده قسطمونينڭ مدرسۀِ نوريه‌سنه گيردم، نورلرڭ تأليفنه باشلادم. فيضى، أمين، حلمى، صادق، نظيف، صلاح الدين گبى نورڭ قهرمان شاكردلرى، نورلرڭ نشرى، تكثيرى ايچون او مدرسه‌يه دوام ايتديلر. گنجلكده أسكى طلبه‌لرمله گچيرديگم قيمتدار مذاكرۀِ علميه‌يى داها پارلاق بر صورتده گوسترديلر. صوڭره گيزلى دشمنلريمز بعض مأمورلرى و بر قسم أنانيتلى خواجه‌لر و شيخلرى عليهمزه أوهاملانديرديلر. بزى، دڭزلى حپسنه بش آلتى ولايتلردن گلن نور طلبه‌لرينى، او مدرسۀِ يوسفيه‌ده طوپلانمغه وسيله اولديلر. بو اون آلتنجى رجانڭ تفصيلاتى، قسطمونيدن گوندروب لاحقه‌يه گچن و دڭزلى حپسنده اوراده‌كى قارداشلريمه گيزلى گوندرديگم كوچك مكتوبلر و محكمه‌سنده‌كى مدافعه رساله‌سيدر كه؛ بو رجانڭ حقيقتنى پارلاق گوسترييورلر. تفصيلاتنى لاحقه‌يه، مدافعه‌مه حواله ايدوب، غايت قيصه إشارت ايده‌جگز