صوڭره بزى دڭزلى حپسنه آلديلر. بنى تجريدِ مطلق ايچنده عفونتلى، رطوبتلى صوغوق بر قوغوشه صوقديلر. إختيارلق، خسته‌لق و بنم يوزمدن معصوم آرقداشلريمڭ زحمتلرندن بڭا گلن چوق تألّم و نورلرڭ تعطيل و مصادره‌سندن گلن چوق تأسّف و صيقنتى ايچنده چيرپنيركن، بردن عنايتِ ربّانيه إمداده يتيشدى. بردن او قوجه حپسخانه‌يى بر درسخانۀِ نوريه‌يه چويروب بر مدرسۀِ يوسفيه (ع‌س) اولديغنى إثبات ايده‌رك، مدرسة الزهرا قهرمانلرينڭ ألماس قلملريله نورلر إنتشاره باشلادى. حتّى او آغير شرائط ايچنده نورڭ قهرمانى، اوچ درت آى ظرفنده يگرميدن زياده ميوه و مدافعات رساله‌سندن يازدى. هم حپسده، هم خارجده فتوحاته باشلاديلر. او مصيبتده‌كى ضرريمزى بيوك منفعتلره و صيقنتيلريمزى سَوينجلره چويردى. {عَسٰى اَنْ تَكْرَهُوا شَيْئًا وَهُوَ خَيْرٌ لَكُمْ} سرّينى تكرار گوستردى.

صوڭره برنجى أهلِ وقوفڭ ياڭليش و سطحى ضبطلره بناءً عليهمزده شدّتلى تنقيدلرى و معارف وكيلنڭ دهشتلى هجوميله برابر عليهمزده بر بياننامه نشر ايتمسيله، حتّى بعض خبرلرله بر قسممزڭ إعدامنه چاليشلديغى هنگامده، بر عنايتِ ربّانيه إمداديمزه يتيشدى. باشده آنقره أهلِ وقوفنڭ شدّتلى تنقيدلرينى بكلركن، تقديركارانه راپورلرى، حتّى بش صندوق نور رساله‌لرنده بش اون سهو بولدقلرى حالده، محكمه‌ده اونلرڭ سهو و ياڭليش گوستردكلرى نقطه‌لر عينِ حقيقت اولديغنى و اونلرڭ سهو و ياڭليش ديدكلرى مادّه‌لرده كنديلرى سهو ايتدكلرينى إثبات ايتديگمز گبى، بش ياپراق راپورلرنده بش اون سهو و ياڭليشلرينى گوستردك. و يدى مقاماته گوندرديگمز ميوه و مدافعه‌نامه رساله‌لرى و عدليه وكالتنه گوندريلن نورڭ عموم رساله‌لرى، خصوصًا محرملرڭ طوقوناقلى و شدّتلى طوقاتلرينه مقابل تهديدكارانه شدّتلى أمرلر بكلركن غايت ملايمانه، حتّى تسلّيكارانه باش وكيلڭ بزه گوندرديگى مكتوبى گبى، مصالحه طرزنده ايليشمه‌ملرى قطعى إثبات ايتدى كه: رسالۀِ نورڭ حقيقتلرى عنايتِ إلٰهيه كرامتيله، اونلرى مغلوب ايدوب كندينى اونلره إرشادكارانه اوقوتديرمش، او گنيش دائره‌لرى بر نوع درسخانه ياپمش، چوق متردّد و متحيّرلرڭ ايمانلرينى قورتارمش و بزم صيقنتيلريمزدن يوز درجه زياده معنوى فرح و فائده ويردى