ايشته، أى توركجيلك دعوا ايدن ملحد ظالملر! تورك ملّتنڭ مدارِ إفتخارلرى اولابيله‌جك بو قدر ذاتلرى غايت عادى و أهمّيتسز بهانه‌لر ايله (سزڭ تعبيريڭزله) بنم گبى بر كرد يوزندن پريشان ايتمك، تذليل ايتمك ملّيتجيلك ميدر؟ توركجيلك ميدر؟ وطن‌پرورلك ميدر؟ هايدى، او إنصافسز وجدانڭزه حواله ايدييورم.

ايشته محكمۀِ عادله، اونلرڭ معصوميتنى آڭلامقله چوقلرينى تخليه ايتدى. أگر اورته‌ده بر صوچ وارسه، او صوچ بنمدر. اونلر، علوِّ جنابلرندن، بنم گبى غريب و إختيار بر خواجه‌يه؛ صوبا ياقمق، صو گتيرمك، يمك پيشيرمك و كنديمه مخصوص بر رساله‌مى تبييض ايتمك گبى جزئى ايشلريمى صِرف ِﷲ ايچون ياپمشلر و بنم خاطرم ايچون خاطره دفترم حكمنده اولان ايكى رساله‌مڭ آخرلرنده، بر خاطره اولمق اوزره إمضالرينى آتمشلر. عجبا دنياده، بويله‌لرى، بويله بهانه‌لرله مؤاخذه ايده‌جك بر قانون، بر اصول و بر مصلحت وار مى؟

أى هيئتِ حاكمه! گله‌جك بياناتمده، بلكه وظيفه‌ڭزجه لزومسز شيلر بولونه‌جق. فقط بو مسئله‌لر ايله عموم مملكت، بلكه دنيا علاقه‌داردر. يالڭز سز دگل، اونلر دخى معنًا ديڭله‌يورلر. هم بياناتمده إنتظامسزلق گوره‌جكسڭز. سببى ايسه، مهمّ بر حقّم بڭا ويريلمدى. بنم حسنِ خطّم يوق. چوق رجا ايتدم كه، بو حيات ممات مسئله‌سنده بر يازيجى بڭا ويريڭز؛ تا حقّمى مدافعه ايچون بر إستدعا يازديره‌يم. ويرمديلر. بلكه بنى ايكى آى، غايت إنصافسزجه‌سنه بتون بتون قونوشمقدن منع ايتديلر. اونڭ ايچون، غايت نقصان و مشوّش يازمله إنتظاملى يازامدم. ايشته آخر بياناتم بودر