حالبوكه رسالۀِ نور، حياتِ إجتماعيه‌نڭ قانونلرينى ده إحاطه ايدن دينڭ گنيش دائره‌سندن بحث ايتمز. بلكه أصل موضوعى و هدفى؛ دينڭ أڭ خاص و أڭ يوكسك قسمى اولان ايمانڭ أركانِ عظيمه‌سندن بحث ايدر. هم أكثريتله مخاطبم، أوّل كندى نفسم، صوڭره آوروپا فيلسوفلريدر. بويله مسائلِ قدسيه‌دن، طوغرى اولمق شرطيله ضرر توهّم ايدن، يالڭز شيطانلر اولابيليرلر تصوّرنده‌يم. يالڭز اوچ درت رساله، تنقيدكارانه شكوا صورتنده بر قسم مأمورلره باقمش. فقط او رساله‌لر، حكومتله مبارزه و تنقيد ايچون دگل، بلكه بڭا ظلم ايدن و مأموريتنى سوءِ إستعمال ايدن بر قسم مأمورلره قارشيدر. هم صوڭره‌دن سوءِ تفهّمه مدار اولمامق ايچون، او اوچ درت رساله‌لره ”محرمدر“ دييوب نشرينى منع ايتمشيز. سائر رساله‌لرڭ أكثرِ مطلقه‌سى، درت بش سنه أوّل، بر قسمى سكز اون سنه أوّل و بر قسمى اون اوچ سنه أوّل تأليف ايديلمشلر. يالڭز إقتصاد و إختيارلر و خسته‌لر رساله‌لرى گچن سنه تأليف ايديلمشلر. بونڭله برابر رساله‌لر، حكومتڭ قانونلرينه مغاير اولماديغنى و آسايشى إخلال و خلقى إضلال ماهيتنده بولونماديغنى و بِالعكس حكومتجه تقديرلرله قارشيلانمه‌سى لازم گلديگنى، ذرّه مقدار عقلى بولونان و رساله‌لرى بى‌طرفانه تدقيق ايدن تصديق ايدر. و أگر فرضِ محال اولارق، حكومتڭ نقطۀِ نظرينه چوق نقطه‌لرى مخالف اولسه بيله، ٢٨ تمّوز ٩٣٣ تاريخندن أوّلكى جُرملرڭ بو قسملرينى عفو ايتمكده اولان و أخيرًا نشر ايديلن عفو قانونى موجبنجه او رساله‌لرى تعقيبه محل قالماديغنى إدّعا ايدوب، بزه ايديلن حقسزلغڭ بر آن أوّل رفع ايديلمسنى و رساله‌لرڭ إعاده اولونماسنى طلب ايدرم.