الجواب: أوّلا، بنم مطبعه‌م يوق و كاتبلرم يوقدر كه وظيفۀِ نشرى ياپسين. بزمكى خصوصيدر. خصوصى ايشلره، خصوصًا ايمانى و وجدانى اولسه، حرّيتِ وجدان دستورى، اونڭ سربستيتنى تأمين ايدر

ثانيًا: حكومتِ إتّحاديه إتّفاقله بنى دار الحكمة الإسلاميه‌ده آوروپايه قارشى حقائقِ إسلاميه‌يى إثبات ايده‌جك و ملّته درس ويره‌جك بر وظيفه ايله توظيف ايتمه‌لرى و ديانت رياستنڭ وانده بنى واعظ تعيين ايتمه‌سى و شيمدى‌يه قدر يوز رساله‌دن زياده أثرلرم علمانڭ أللرنده گزمه‌سى و تنقيد ايديلمه‌مسى إثبات ايدر كه، ملّته درس ويرمگه حقّم واردر

ثالثًا: أگر قبر قپوسى قپانسه ايدى و إنسان دنياده لا يموت قالسه ايدى، او وقت وظيفه‌لر يالڭز عسكرى و إدارى و رسمى اولوردى. مادام هر گون لا أقل اوتوز بيڭ شاهد، جنازه‌لريله {اَلْمَوْتُ حَقٌّ} دعواسنى إمضا ايدييورلر؛ ألبته دنيايه عائد وظيفه‌لردن داها أهمّيتلى ايمانى وظيفه‌لر وار. ايشته رسالۀِ نور او وظيفه‌لرى قرآنڭ أمريله ايفا ايدييور. مادام رسالۀِ نورڭ آمرى و حاكمى اولان قرآنڭ قومانداسى اوچ يوز أللى ميليونه حكم ايدوب تعليمات ياپديرييور؛ و هر گون لا أقل بش دفعه، بشدن دردينڭ أللرينى درگاهِ إلٰهيه‌يه آچديرييور؛ و بتون جامعلرده و جماعتلرده و نمازلرده، قدسى و سماوى فرمانلرينى حرمتله اوقوتديرييور؛ ألبته اونڭ حقيقى بر تفسيرى و او گونشڭ بر نورى و اونڭ بر مأمورى اولان رسالۀِ نور، او وظيفۀِ ايمانيه‌يى بِإذْنِ اﷲ صدمه‌لره اوغراتميه‌رق گوره‌جكدر. اويله ايسه أهلِ دنيا و أهلِ سياست، اونڭله مبارزه دگل، بلكه اوندن إستفاده ايتمگه پك چوق محتاجدرلر. أوت شو كائناتڭ طلسمِ مغلقنى كشف ايدن و موجوداتڭ نره‌دن و نره‌يه و نه اولاجقلرينڭ طلسمنى آچان رسالۀِ نورڭ أجزالرندن يگرمى طوقوزنجى سوز و تحوّلاتِ ذرّاتڭ معمّاسنى كشف ايدن اوتوزنجى سوز و كائناتده متماديًا فنا و زوال ايچنده فعاليت و خلاّقيتِ عموميه طلسمِ عجيبنى حلّ و كشف ايدن يگرمى دردنجى مكتوب و توحيدڭ أڭ درين و أڭ مهمّ معمّاسنى كشف و حلّ و ايضاح ايدن و حشرِ بشرى بر سينكڭ إحياسى قدر قولاى اولديغنى إثبات ايدن يگرمنجى مكتوب و طبيعت‌پرستلرڭ فكرِ كفريلرينى أساسيله بوزان و تخريب ايدن طبيعت رساله‌سى نامنده‌كى يگرمى اوچنجى لمعه گبى رسالۀِ نورڭ چوق جزءلرى وار. بونلرڭ يالڭز بريسنده‌كى معمّايى كشف ايدن بر عالم، بر أديب، بر پروفسور، هانگى حكومتده اولسه، تقديرله مكافات و إكراميه ويريله‌جگنى، بو رساله‌لرى دقّتله مطالعه ايدن تصديق ايدر