هم قرارنامه‌ده ناصل كلمه‌لر و مكتوبلرڭ مبالغه‌لرى اوستنده اوينامشلر و معنالر چيقارمشلر. اويله ده: سطحى بر تدقيقات ايله پك ياڭليش حكملرى وار. مثلا: خسروڭ أونده اوچ معجزاتِ أحمديه (ع‌ص‌م) بولونمش. بونى طوقوز رساله يعنى متعدّد رساله‌لر بولونديغنى گوسترمكله، تكثيرينه چاليشمق ايله إتهام ايديلييور. حالبوكه اونلر طوقوز رساله دگل، اوچ رساله‌در. هر برينڭ اوچ پارچه‌سى بربرينه ديكيلمه‌مش. ضابطه طرفندن معجزاتِ أحمديه‌دن (ع‌ص‌م) خصوصى نسخه‌م مصادره ايديلدكدن صوڭره معجزاتِ أحمديه‌نڭ (ع‌ص‌م) بر عيننى كندم ايچون رجا ايله خسروه بر نسخه‌سنى يازديرمق اوزره باشقه بر قارداشمدن معجزاتِ أحمديه‌نڭ (ع‌ص‌م) كرامتلى بر نسخه‌سنى أمانةً آلدم، خسروه ويردم. بيچاره خسروڭ ده او كتابدن بر نسخه‌سى واردى، مقابله ايتمك اوزره اونى برلشديرمش. تحرّى أثناسنده اوچى بردن آلينمشدر.

هم قرار ويرنلرڭ سطحى تدقيقاتنه بر دليل ده شودر كه: يگرمى سنه‌لك رساله‌لريمڭ بر قسمنڭ فهرسته‌سى اولان اون بشنجى لمعه‌نڭ هر بر پارچه‌سنى برر رساله ظن ايدوب، او فهرسته‌ده بحث ايديلن بعض مسئله‌لرله مؤاخذه‌يه قالقيشمشلر. هيچ فهرسته ايله مؤاخذه ايديلير مى؟ و اونلرڭ هر بر پارچه‌سنه برر رساله نظريله باقيلير مى؟ هم بارلادن مفارقتمدن بر سنه صوڭره، اوطه‌مڭ بر كوشه‌سنده إمضاسز پك أسكى بر مكتوب بولونمش. او مكتوبى بندن صورديلر. إمضاسز بلكه يدى سكز سنه أوّل بريسى طرفندن گلمش وياخود بريسى طرفندن اورايه صوقولمش. عربى كلماتڭ توركجه‌دن قالديريلماسنه دائر بريسى فكرينى يازمش. بونى مدارِ مؤاخذه ايدييورلر. مكتوب بنم دگل. إمضاسى يوق. بر سنه‌دن بَرى ترك ايتديگم بر اوطه‌ده غايت أسكى بر طرزده و او مكتوبه أهمّيت ويريلديگى و جواب يازيلديغنه دائر بر أماره گورولمديگى حالده، مدارِ إتهام طوتولمش. داها قرارنامه‌ده‌كى سائر نقطه‌لرى بونلره قياس ايديلسين.