مسافر صورغو حاكملرى گوجنمه‌سينلر. بتون قوّتمله اونلرڭ بڭا إسناد ايتدكلرى، إفساد و خلقى إضلال و منفى طويغولرى، سياستجيلگى ردّ ايدييورم. و اونلرڭ وظيفه‌سنه و شخصلرينه ايليشمييورم. فقط تحقيقاتلرنده إستناد ايتدكلرى أساسات، غرضكار مخبرلرڭ أوهاملريدر. او مسافر صورغو حاكملرينڭ بنم بو شدّتلى إفاده‌مدن گوجنمه‌يه حقلرى يوقدر. چونكه اونلر بزم حيات و ممات مسئله‌مزده دقّتسزلكلرى ايله بزه ايليشييورلر. و كلمه‌لر اوزرنده حياتمزله اوينايورلر. بز گوجنمه‌دك. يالڭز حقّمزى مدافعه ايدييورز. بن شدّتمله اونلرڭ أفكارلرينى تزييف ايتمييورم، بلكه أوهاملرينى إزاله ايدييورم. و آلدانديڭز دييه بر پارچه أنانيتلرينه ايليشييورم. بوندن گوجنمه‌يه حقلرى يوقدر. يوكسك محكمه ايسه؛ ألبته بڭا و صورغو حاكملرينه يوكسك مقامده عادلانه باقار.

دردنجى نقطه: قرارنامه حقسز و دقّتسز اولديغندندر كه؛ حربِ عمومى گبى بر مصيبتِ عظيمه‌يى و مملكتمزده ولاياتِ شرقيه‌نڭ أرمنى قوميته‌سى يوزندن قتلِ عاملره و ولاياتِ غربيه أهاليسنڭ چوقلرى يونانليلر طرفندن روملر أليله قتللرينه سببيت ويرن و فتنۀِ آخر زمانى آڭديران چوق فتنه‌لره مظهر اولان بو عصره يوز بيڭ دفعه ”ياشاسين جهنّم“ ديديگى و روم و أرمنى قوميته‌لرينڭ منافق غدّارلرينى بزه مسلّط ايدن آوروپانڭ إنسانيت‌پرورلگنى إدّعا ايدن ظالملرڭ قولاقلرينى چينلاتان اوچ درت صحيفه‌لك بر أثريمه إشارت ايدن فهرسته‌نڭ عليهمه مدارِ مسئوليت ايديلمسيدر.

عجبا بو صورغو حاكملرى بو عصرڭ بتون سيّئاتنى اونوتمشلر مى كه؛ بنم گبى چوق جهتلرله بو عصرڭ ضربه‌سنى يين بر آدمڭ شكواسنى بويله موجبِ مسئوليت تلقّى ايدييورلر؟ هم قرارنامه‌ده إعتراضنامه‌مه إعتراض يولنده دينيلمش: ”ديانت رياستنه أثرلرينى گوندرمه‌سنه بدل خليل إبراهيمه گوندرمشدر.“