ايكنجى سؤال: شدّتله و آمرانه دينيلدى كه: ”سن رسالۀِ نورڭ مقبوليتنه دائر حضرتِ على (رض) و غوثِ أعظم (رض) گبى ذاتلرڭ قصيده‌لرندن شاهدلر گوسترييورسڭ. حالبوكه، أصل سوز صاحبى قرآندر. رسالۀِ نور، قرآنڭ حقيقى بر تفسيرى و حقيقتنڭ بر ترجمانى و مسئله‌لرينڭ برهانيدر. قرآن ايسه، سائر كلاملر گبى قشرلى، كميكلى و شعورى خصوصى و جزئى دگلدر. بلكه قرآن، عموم إشاراتيله و أجزاسيله عينِ شعوردر، قشرسزدر؛ فضولى، لزومسز مادّه‌لرى يوقدر. عالمِ غيبڭ ترجمانيدر. سوزلر حقّنده سوز اونڭدر، گوره‌لم او نه دييور؟“

الجواب: رسالۀِ نور طوغريدن طوغرى‌يه قرآنڭ باهر بر برهانى و قوّتلى بر تفسيرى و پارلاق بر لمعۀِ إعجازِ معنويسى و او بحرڭ بر رشحه‌سى و او گونشڭ بر شعاعى و او معدنِ علمِ حقيقتدن ملهم و فيضندن گلن بر ترجمۀِ معنويه‌سى اولديغندن اونڭ قيمتنى و أهمّيتنى بيان ايتمك قرآنڭ شرفنه و حسابنه و ثناسنه گچديگندن، ألبته رسالۀِ نورڭ مزيتنى بيان ايتمكلگى، حق إقتضا ايدر و حقيقت ايستر، قرآن إذن ويرر. بنم گبى بر ترجمانڭ حصّه‌سى يالڭز شكردر. هيچ بر جهتله فخره، تمدّحه، غروره حقّى يوقدر و اولاماز. گله‌جك آيتلرڭ إشاراتنه بو نقطۀِ نظرله باقمق گركدر. يوقسه بنى خودبينلك ايله إتهام ايدنلره حقّمى حلال ايتمه‌م

بو چوق أهمّيتلى سؤاله قارشى ايكى اوچ ساعت ظرفنده بردن قرآنڭ آياتِ مشهوره‌سندن ”سوزلر“ عددنجه اوتوز اوچ آيتڭ هم معناسيله، هم جفر ايله رسالۀِ نوره إشارتلرى اوزاقدن اوزاغه إجمالاً گورولدى. آيرى آيرى طرزلرده اوتوز اوچ آيت متّفقًا رسالۀِ نورى رمزلريله گوسترديگى خيال ميال گورولدى