اوچنجى جمله‌سى: {مِنْ شَجَرَةٍ} در. أگر {مِنْ شَجَرَةٍ} ده‌كى (ة) وقفلرده گبى (هـ) صاييلسه بش يوز طقسان سكز (٥٩٨) ايده‌رك تام تامنه رسائل النور و رسالۀِ‌ النور عددى اولان بش يوز طقسان سكزه توافقله برابر {مِنْ فُرْقَانٍ حَكِيمٍ} ڭ عددينه ينه سرلى بر تك فرقله توافقِ رمزى ايله، هم رسائل النورى أفرادينه داخل ايدر، هم ينه رسالۀِ‌ النورڭ شجرۀِ مباركى (فرقانِ حكيم) اولديغنى گوسترر. أگر {مِنْ شَجَرَةٍ} ده‌كى (ة)، (ت) قالسه، او وقت مقامِ جفريسى طوقوز يوز طقسان اوچ (٩٩٣) ايدر. توافقه ضرر ويرمه‌ين جزئى و سرلى بش فرقله رسالة النور عددى اولان طوقوز يوز طقسان سكزه (٩٩٨) توافقله معناسنڭ دخى موافقتنه بناءً اوڭا إشارت ايدر.

دردنجى جمله‌سى: {نُورٌ عَلٰى نُورٍ يَهْدِى اﷲُ لِنُورِهِ} در كه، طوقوز يوز طقسان طوقوز (٩٩٩) ايده‌رك سرلى بر تك فرقله رسالة النور عددى اولان طوقوز يوز طقسان سكزه (٩٩٨) توافقله معناسنڭ قوّتلى مناسبتنه بناءً إشارت درجه‌سنده رمز ايدر.

بشنجى جمله‌سى: {مَنْ يَشَاءُ} جمله‌سى غايت جزئى بر فرقله رسالة النور مؤلّفنڭ إسميله مشهور بر لقبنه توافقله معناسى باقديغى گبى باقييور. أگر {يَشَاءُ} ده‌كى مقدّر ضمير إظهار ايديليرسه {مَنْ يَشَائُهُ} اولور. تام تامنه توافق ايدر.

بو آيت ناصلكه رسالۀِ‌ النوره إسميله باقييور، اويله ده تاريخِ تأليفنه و تكمّلنه تام تامنه توافقله رمزًا باقييور: {كَمِشْكٰوةٍ فِيهَا مِصْبَاحٌ اَلْمِصْبَاحُ فِى زُجَاجَةٍ} جمله‌سى {كَمِشْكٰوةٍ} ده‌كى تنوين وقف يرى اولماديغندن نون صاييلمق و {فِى زُجَاجَةٍ} وقف يرى اولديغندن (ة)، (هـ) اولمق جهتيله بيڭ اوچ يوز قرق طوقوز (١٣٤٩) ايده‌رك، رسائل النورڭ أڭ نورانى جزءلرينڭ تأليفى هنگامى و تكمّل زمانى اولان بيڭ اوچ يوز قرق طوقوز تاريخنه تام تامنه توافقله إشارت ايدر