شو آيتِ نوريه‌نڭ معناجه چوق طبقاتى و وجوهِ كثيره‌سى واردر. و او طبقه‌لردن و وجهلردن إشارى و رمزى بر وجهى، معناجه و جفرجه نورلى بر تفسيرى اولان رسالۀِ‌ النور و رسالة النوره درت بش جمله‌سيله اون جهتدن باقييور. و او طبقه‌لردن و او وجهلردن بر طبقه و بر پرده دخى معجزانه ألكتريقدن خبر ويرييور.

رسالۀِ نوره باقان برنجى جمله‌سى: {مَثَلُ نُورِهِ كَمِشْكٰوةٍ فِيهَا مِصْبَاحٌ} در. يعنى: نورِ إلٰهينڭ ويا نورِ قرآنينڭ ويا نورِ محمّدينڭ (ع‌ص‌م) مثالى شو {مِشْكٰوةٍ فِيهَا مِصْبَاحٌ} در. مقامِ جفريسى طوقوز يوز طقسان سكز (٩٩٨) اولارق عينًا رسالة النور، (شدّه‌لى نون ايكى نون صاييلمق جهتيله) تام تامنه توافقله اوڭا إشارت ايدر.

ايكنجى جمله‌سى: {اَلزُّجَاجَةُ كَاَنَّهَا كَوْكَبٌ دُرِّىٌّ يُوقَدُ} در. يگرمى سكزنجى لمعه‌ده تفصيلاً بيان ايديلديگى گبى، إمامِ على (رض) قصيدۀِ جلجلوتيه‌سنده صراحت درجه‌سنده رسالۀِ‌ النوره باقه‌رق و اوڭا إشارت ايده‌رك ديمش: {اَقِدْ كَوْكَبِى بِاْلاِسْمِ نُورًا} بن تخمين ايدييورم كه، إمامِ على‌نڭ (رض) بو إشارتى، بو جملۀِ نوريه‌نڭ رمزندن ملهمدر. بو جملۀِ آيتڭ مقامى، بش يوز قرق آلتى (٥٤٦) ايدوب، رسالۀِ نورڭ عددى اولان بش يوز قرق سكزه (٥٤٨) غايت جزئى و سرلى ايكى فرق ايله توافق نقطه‌سندن إشارت ايتديگى گبى، رمزى بر معناسيله تام باقييور