اوچنجى آيتِ مشهوره: {وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا} آيتى قوّتلى مناسبتِ معنويه‌سيله برابر جفرجه بيڭ اوچ يوز قرق درت (١٣٤٤) ايدر كه، او تاريخده رسالۀِ نورڭ شاكردلرى گبى بو آيتڭ معناسنه داها زياده مظهر اولانلر ظاهرًا گورولمييور. ديمك بو آيت، معناسنڭ متعدّد طبقه‌لرندن إشارى بر طبقه‌دن و رمزى بر پرده‌دن قرآنڭ پارلاق بر تفسيرى اولان رسالۀِ نوره باقييور و أڭ أوّل نازل اولان سورۀِ علقده {اِنَّ اْلاِنْسَانَ لَيَطْغٰى} آيتى گبى معناسيله و مقامِ جفريله إفاده ايدييور كه؛ بيڭ اوچ يوز قرق درتده نوعِ إنسان ايچنده فرعونانه أمثالسز بر طغيان، بر إنكار چيقه‌جق. {وَالَّذِينَ جَاهَدُوا فِينَا} آيتى ايسه، او طغيانه قارشى مجاهده ايدنلرى ثنا ايدييور.

أوت حربِ عمومى نتيجه‌لرندن هم عالمِ إنسانيت، هم عالمِ إسلاميت چوق ضرر گورديلر. نوعِ إنسانڭ، خصوصًا آوروپانڭ مغرور و جبّارلرى، بِالخاصّه بريسى، قوّت و غنايه و پاره‌يه إستناد ايده‌رك فرعونانه بر طغيانه گيردكلرندن، او خصوصى إنسانلر نوعِ بشرى مسئول ايدييور دييه إنسان إسمِ عموميسيله تعبير ايديلمش. أگر {لَنَهْدِيَنَّهُمْ} ده‌كى شدّه‌لى ”نون“ بر ”نون“ صاييلسه، بيڭ ايكى يوز طقسان درت (١٢٩٤) ايدر كه رسالة النور مؤلّفنڭ بسملۀِ حياتيدر و تاريخِ ولادتنڭ برنجى سنه‌سيدر. أگر شدّه‌لى ”لام“ ايكى ”لام“ و ”نون“ بر صاييلسه، او وقت بيڭ اوچ يوز يگرمى درتده (١٣٢٤) حرّيتڭ إعلانى هنگامنده مجاهدۀِ معنويه ايله تظاهر ايدن رسالۀِ‌ النور مؤلّفنڭ گورونمسى تاريخيدر