أگر جميلِ ذو الجلالڭ أسماسنده‌كى حُسنلرڭ موجودات آيينه‌لرنده بر جلوه‌سنى مشاهده ايتمك ايسترسه‌ڭ، زمينڭ يوزينى بر كوچك باغچه گبى تماشا ايده‌جك بر گنيش، خيالى گوز ايله باق و هم بيل كه: رحمانيت، رحيميت، حكيميت، عادليت گبى تعبيرلر، جنابِ حقّڭ هم إسم، هم فعل، هم صفت، هم شأنلرينه إشارت ايدرلر

ايشته باشده إنسان اولارق بتون حيواناتڭ منتظمًا بر پردۀِ غيبدن گلن أرزاقلرينه باق، رحمانيتِ إلٰهيه‌نڭ جمالنى گور

هم بتون ياورولرڭ معجزانه إعاشه‌لرينه و باشلرى اوستنده و آننه‌لرينڭ سينه‌لرنده آصيلمش طاتلى، صافى، آبِ كوثر گبى ايكى طولومبه‌جق سوته تماشا أيله، رحيميتِ ربّانيه‌نڭ جاذبه‌دار جمالنى گور

هم بتون كائناتى أنواعيله برابر بر كتابِ كبيرِ حكمت و اويله بر كتاب كه؛ هر حرفى يوز كلمه، هر كلمه‌سى يوزر سطر، هر سطرى بيڭ باب، هر بابى بيڭلر كوچك كتاب حكمنه گتيرن حكيميتِ إلٰهيه‌نڭ جمالِ بى‌مثالنه باق، گور

هم كائناتى بتون موجوداتيله ميزانى آلتنه آلان و بتون أجرامِ علويه و سفليه‌نڭ موازنه‌لرينى إدامه ايتديرن و گوزللگڭ أڭ مهمّ بر أساسى اولان تناسبى ويرن و هر شيئه أڭ گوزل وضعيتى ويرديرن و هر ذى‌حياته حقِّ حياتى ويروب إحقاقِ حق ايدن و متجاوزلرى طورديران و جزالانديران بر عادليتڭ حشمتلى گوزللگنه باق گور

هم إنسانڭ گچمش تاريخچۀِ حياتنى، بغداى دانه‌سى كوچكلگنده‌كى قوّۀِ حافظه‌سنده و هر نبات و آغاجڭ گله‌جك تاريخچۀِ حياتِ ثانيه‌سنى چكردگنده يازماسنه و هر ذى‌حياتڭ محافظه‌سنه لزومى بولونان آلات و جهازاته، مثلا آرينڭ قنادجقلرينه و زهرلى ايگنه‌سنه و تيكنلى چيچكلرڭ سونگوجكلرينه و چكردكلرڭ سرت قابوقلرينه باق و حفيظيت و حافظيتِ ربّانيه‌نڭ لطافتلى جمالنى گور