مثلا: رسولِ أكرم عليه الصلاة والسلام، او گيجه‌ده جنابِ حقّه قارشى سلام يرنده {اَلتَّحِيَّاتُ ِﷲِ} ديمش. يعنى: ”بتون ذى‌حياتلرڭ حياتلريله گوستردكلرى تسبيحاتِ حياتيه و صانعلرينه تقديم ايتدكلرى فطرى هديه‌لر، أى ربّم سڭا مخصوصدر. بن دخى بتون اونلرى تصوّرمله و ايمانمله سڭا تقديم ايدييورم.“

أوت ناصلكه رسولِ أكرم عليه الصلاة والسلام {اَلتَّحِيَّاتُ} كلمه‌سيله، بتون ذى‌حياتڭ عباداتِ فطريه‌لرينى نيّت ايدوب تقديم ايدييور. اويله ده: تحيّاتڭ خلاصه‌سى اولان {اَلْمُبَارَكَاتُ} كلمه‌سيله ده، بتون مدارِ بركت و تبريك و بارك اﷲ ديديرن و ”مبارك“ دينيلن و حياتڭ و ذى‌حياتڭ خلاصه‌سى اولان مخلوقلر، خصوصًا تخملرڭ و چكردكلرڭ، دانه‌لرڭ، يمورطه‌لرڭ فطرى مباركيتلرينى و بركتلرينى و عبوديتلرينى تمثيل ايده‌رك، او گنيش معنا ايله سويله‌يور. و مباركاتڭ خلاصه‌سى اولان {اَلصَّلَوَاتُ} كلمه‌سيله ده ذى‌حياتڭ خلاصه‌سى اولان بتون ذى‌روحڭ عباداتِ مخصوصه‌لرينى تصوّر ايدوب درگاهِ إلٰهى‌يه او إحاطه‌لى معناسيله عرض ايدييور. و {اَلطَّيِّبَاتُ} كلمه‌سيله ده، ذى‌روحڭ خلاصه‌لرى اولان كامل إنسانلرڭ و ملائكۀِ مقرّبينڭ، صلواتڭ خلاصه‌سى اولان طيّبات ايله نورانى و يوكسك عبادتلرينى إراده ايده‌رك معبودينه تخصيص و تقديم ايدر.

هم ناصلكه او گيجه‌ده جنابِ حق طرفندن {اَلسَّلاَمُ عَلَيْكَ يَا اَيُّهَا النَّبِىُّ} ديمسى، إستقبالده يوزر ميليون إنسانلرڭ هر برى، هر گون، هيچ اولمازسه اون دفعه {اَلسَّلاَمُ عَلَيْكَ يَا اَيُّهَا النَّبِىُّ} ديمه‌لرينى آمرانه إشعار ايدر. و او سلامِ إلٰهى، او كلمه‌يه گنيش بر نور و يوكسك بر معنا ويرر. اويله ده: رسولِ أكرم عليه الصلاة والسلامڭ، او سلامه مقابل {اَلسَّلاَمُ عَلَيْنَا وَعَلٰى عِبَادِ اﷲِ الصَّالِحِينَ} ديمسى، إستقبالده معظّم اُمّتى و امّتنڭ صالحلرى، سلامِ إلٰهى‌يى تمثيل ايدن إسلاميته مظهر اولماسنى و إسلاميتڭ عمومى بر شعارى اولان مؤمنلر اورته‌سنده‌كى {اَلسَّلاَمُ عَلَيْكَ وَ عَلَيْكَ السَّلاَمُ} عموم اُمّت ديمه‌سنى راجيانه، داعيانه خالقندن ايستديگنى إفاده و إخطار ايدر. و او صحبتده حصّه‌دار اولان حضرتِ جبرائيل عليه السلام، أمرِ إلٰهى ايله او گيجه {اَشْهَدُ اَنْ لاَ اِلٰهَ اِلاَّ اﷲُ وَ اَشْهَدُ اَنَّ مُحَمَّدًا رَسُولُ اﷲِ} ديمسى، بتون اُمّت قيامته قدر بويله شهادت ايده‌جگنى و بويله دييه‌جكلرينى مبشّرانه خبر ويرر. و بو مكالمۀِ قدسيه‌يى تخطّر ايله كلمه‌لرڭ معنالرى پارلار، گنيشلنير