ايكنجى سؤال: تشهّد آخرنده {اَللّٰهُمَّ صَلِّ عَلٰى مُحَمَّدٍ وَعَلٰى اٰلِ مُحَمَّدٍ كَمَا صَلَّيْتَ عَلٰى اِبْرَاهِيمَ وَعَلٰى اٰلِ اِبْرَاهِيمَ} ده‌كى تشبيه، تشبيهلرڭ قاعده‌سنه اويغون گلمييور. چونكه محمّد عليه الصلاة والسلام، إبراهيم عليه السلامدن داها زياده رحمته مظهردر و داها بيوكدر. بونڭ سرّى نه‌در؟ هم بو طرزده‌كى صلواتڭ تشهّدده تخصيصنڭ حكمتى نه‌در؟ عين دعا، أسكى زماندن بَرى بتون امّت هر نمازده تكرار ايتمه‌لرى... حالبوكه بر دعا بر دفعه قبوله مظهر اولسه يتر. ميليونلرجه دعالرى مقبول اولان ذاتلر مصرّانه دعا ايتمه‌سى و بِالخاصّه او شى وعدِ إلٰهى‌يه إقتران ايتمش ايسه... مثلا: {عَسٰى اَنْ يَبْعَثَكَ رَبُّكَ مَقَامًا مَحْمُودًا} جنابِ حق وعد ايتديگى حالده، هر أذان و قامتدن صوڭره ايديلن مروى دعاده {وَابْعَثْهُ مَقَامًا مَحْمُودًا الَّذِى وَعَدْتَهُ} دينيلييور؛ بتون اُمّت او وعدى ايفا ايتمك ايچون دعا ايدرلر. بونڭ سرِّ حكمتى نه‌در؟

الجواب: بو سؤالده اوچ جهت و اوچ سؤال وار

برنجى جهت: حضرتِ إبراهيم عليه السلام، گرچه حضرتِ محمّد عليه الصلاة والسلامه يتيشمييور. فقط اونڭ آلى، أنبيادرلر. محمّد عليه الصلاة والسلامڭ آلى، أوليادرلر. أوليا ايسه، أنبيايه يتيشه‌مزلر. آل حقّنده اولان بو دعانڭ پارلاق بر صورتده قبول اولديغنه دليل شودر كه

اوچ يوز أللى ميليون ايچنده آلِ محمّد عليه الصلاة والسلامدن يالڭز ايكى ذاتڭ؛ يعنى حسن (رض) و حسينڭ (رض) نسلندن گلن أوليا، (أكثرِ مطلق) حقيقت مسلكلرينڭ و طريقتلرينڭ پيرلرى و مرشدلرى اونلر اولمالرى، {عُلَمَاءُ اُمَّتِى كَاَنْبِيَاءِ بَنِى اِسْرَائِيلَ} حديثنڭ مظهرلرى اولدقلريدر. باشده جعفرِ صادق (رض) و غوثِ أعظم (رض) و شاهِ نقشبند (رض) اولارق هر برى، اُمّتڭ بر قسمِ أعظمنى طريقِ حقيقته و حقيقتِ إسلاميته إرشاد ايدنلر، بو آل حقّنده‌كى دعانڭ مقبوليتنڭ ميوه‌لريدرلر