شعاعلر | آلتنجى شعاع | 209
(204-209)

اوچنجى جهت: بو قدر تكرار ايله قطعى ويريله‌جك اولان بر شيئڭ ويرمسنى ايسته‌مه‌سنڭ سرِّ حكمتى شودر: ايسته‌نيلن شى مثلا مقامِ محمود بر اوجدر. پك بيوك و بيڭلر مقامِ محمود گبى مهمّ حقيقتلرى إحتوا ايدن بر حقيقتِ أعظمڭ بر داليدر. و خلقتِ كائناتڭ أڭ بيوك نتيجه‌سنڭ بر ميوه‌سيدر. و اوجى و دالى و او ميوه‌يى دعا ايله ايسته‌مك ايسه؛ طولاييسيله او حقيقتِ عموميۀِ عظمانڭ تحقّقنى و وجود بولماسنى و او شجرۀِ خلقتڭ أڭ بيوك دالى اولان عالمِ باقينڭ گلمه‌سنى و تحقّقنى و كائناتڭ أڭ بيوك نتيجه‌سى اولان حشر و قيامتڭ تحقّقنى و دارِ سعادتڭ آچيلماسنى ايسته‌مكدر. و او ايسته‌مكله، دارِ سعادتڭ و جنّتڭ أڭ مهمّ بر سببِ وجودى اولان عبوديتِ بشريه‌يه و دعواتِ إنسانيه‌يه كنديسى دخى إشتراك ايتمكدر. و بو قدر حدسز درجه‌ده عظيم بر مقصد ايچون، بو حدسز دعالر دخى آزدر. هم حضرتِ محمّد عليه الصلاة والسلامه مقامِ محمود ويريلمسى، عموم أمّته شفاعتِ كبراسنه إشارتدر. هم او، بتون امّتنڭ سعادتيله علاقه‌داردر. اونڭ ايچون حدسز صلوات و رحمت دعالرينى بتون اُمّتدن ايسته‌مسى عينِ حكمتدر.


سُبْحَانَكَ لاَ عِلْمَ لَنَا اِلاَّ مَا عَلَّمْتَنَا اِنَّكَ اَنْتَ الْعَلِيمُ الْحَكِيمُ

سس يوق

شعاعلر