ايكنجى جهت: بو طرزده‌كى صلواتڭ نمازه تخصيصى حكمتى ايسه؛ مشاهيرِ إنسانيه‌نڭ أڭ نورانى، أڭ مكمّلى، أڭ مستقيمى اولان أنبيا و أوليانڭ قافلۀِ كبراسنڭ گيتدكلرى و آچدقلرى يولده، كنديسى دخى او يوزر إجماع و يوزر تواتر قوّتنده بولونان و شاشيرمه‌لرى ممكن اولميان او جماعتِ عظمايه، او صراطِ مستقيمده إلتحاق و رفاقت ايتديگنى تخطّر ايتمكدر. و او تخطّر ايله، شبهاتِ شيطانيه‌دن و أوهامِ سيّئه‌دن قورتولمقدر. و بو قافله، بو كائنات صاحبنڭ دوستلرى و مقبول مصنوعلرى و اونلرڭ معارضلرى، اونڭ دشمنلرى و مردود مخلوقلرى اولديغنه دليل ايسه: زمانِ آدمدن بَرى او قافله‌يه دائما معاونتِ غيبيه گلمه‌سى و معارضلرينه هر وقت مصيبتِ سماويه اينمه‌سيدر.

أوت قَومِ نوح و ثمود و عاد و فرعون و نمرود گبى بتون معارضلر غضبِ إلٰهى‌يى و عذابنى إحساس ايده‌جك بر طرزده غيبى طوقاتلر ييدكلرى گبى.. قافلۀِ كبرانڭ نوح عليه السلام، إبراهيم عليه السلام، موسى عليه السلام، محمّد عليه الصلاة والسلام گبى بتون قدسى قهرمانلرى دخى، خارقه و معجزانه و غيبى بر صورتده معجزه‌لره و إحساناتِ ربّانيه‌يه مظهر اولمشلر. بر تك طوقات، حدّتى؛ بر تك إكرام، محبّتى گوسترديگى حالده، بيڭلر طوقات معارضلره و بيڭلر إكرام و معاونت قافله‌يه گلمه‌سى، بداهت درجه‌سنده و گوندوز گبى ظاهر بر طرزده او قافله‌نڭ حقّانيتنه و صراطِ مستقيمده گيتديگنه شهادت و دلالت ايدر. فاتحه‌ده {صِرَاطَ الَّذِينَ اَنْعَمْتَ عَلَيْهِمْ} او قافله‌يه و {غَيْرِ الْمَغْضُوبِ عَلَيْهِمْ وَ لاَ الضَّالِّينَ} معارضلرينه باقييور. بوراده بيان ايتديگمز نكته ايسه، فاتحه‌نڭ آخرنده داها ظاهردر