سيّاح تماميله ايشيتدى. دوندى نفسنه ديدى كه: مادام بو قهرمان إمام بويله دييور و مادام بر ذرّه قوّتِ ايمانيه‌نڭ زياده‌لشمه‌سى، بر بطمان معرفت و كمالاتدن داها قيمتليدر و يوز أذواقڭ بالندن داها طاتليدر. و مادام بيڭ سنه‌دن بَرى ايمان و قرآن عليهنده تراكم ايدن آوروپا فيلسوفلرينڭ إعتراضلرى و شبهه‌لرى يول بولوب أهلِ ايمانه هجوم ايدييور. و بر سعادتِ أبديه‌نڭ و بر حياتِ باقيه‌نڭ و بر جنّتِ دائمه‌نڭ آناختارى، مدارى، أساسى اولان أركانِ ايمانيه‌يى صارصمق ايسته‌يورلر. ألبته هر شيدن أوّل ايمانمزى تقليددن تحقيقه چويروب قوّتلنديرملى‌يز

اويله ايسه، هايدى ايلرى! گل، بولديغمز برر طاغ قوّتنده‌كى بو يگرمى طوقوز مرتبۀِ ايمانيه‌يى نمازڭ مبارك تسبيحاتنڭ مبارك عددى اولان اوتوز اوچ مرتبه‌سنه إبلاغ ايتمك فكريله، بو عبرتگاهڭ بر اوچنجى منزلنى داها گورمك ايچون بسم اﷲ الرحمن الرحيمڭ آناختارى ايله ذى‌حيات عالمنده‌كى إداره و إعاشۀِ ربّانيه‌نڭ قپوسنى چالمالى‌يز و آچمالى‌يز دييه‌رك، محشرِ عجائب و مجمعِ غرائب اولان بو اوچنجى منزلڭ قپوسنى إسترحامله چالدى، بسم اﷲ الفتّاح ايله آچدى. اوچنجى منزل گوروندى. گيردى، گوردى كه: درت حقيقتِ معظّمه و محيطه او منزلى ايشيقلانديرييورلر و گونش گبى توحيدى گوسترييورلر