بو آيتِ أجمع و أعلى و أكبرڭ بر كلّى و اوزون نكته‌سنى بيان ايتمگه، بر دهشتلى معنوى سؤال و بر عظمتلى و إلٰهى بر نعمتڭ إنكشافندن نشئت ايدن بر حال سببيت ويرديلر. شويله كه: معنًا روحه گلدى؛ نه‌دن بر جزئى حقيقتِ ايمانيه‌يى إنكار ايدن كافر اولور و قبول ايتمه‌ين مسلمان اولماز؟ حالبوكه اﷲ و آخرته ايمان بر گونش گبى او قراڭلغى إزاله ايتمك لازم گلييور. هم نه‌دن بر ركن و حقيقتِ ايمانيه‌يى إنكار ايدن مرتد اولور، كفرِ مطلقه دوشر و قبول ايتمه‌ين إسلاميتدن چيقار؟ حالبوكه سائر أركانِ ايمانيه‌يه ايمانى وارسه، اونى كفرِ مطلقدن قورتارمق لازم گلييور؟

الجواب: ايمان آلتى ركنندن چيقان اويله بر وحدانى حقيقتدر كه، تفريق قبول ايتمز. و اويله بر كلّيدر كه، تجزّى قالديرماز. و اويله بر كلّدر كه قابلِ إنقسام اولمازلر. چونكه هر بر ركنِ ايمانى، كندينى إثبات ايدن حجّتلريله سائر أركانِ ايمانيه‌يى إثبات ايدر. هر برى هر بريسنه غايت قوّتلى بر حجّتِ أعظم اولور. اويله ايسه بتون أركانى، بتون دليللريله صارصميان بر فكرِ باطل، حقيقت نظرنده بر تك ركنى، بلكه بر حقيقتى إبطال ايدوب إنكار ايده‌مز. بلكه عدمِ قبول پرده‌سى آلتنده گوزينى قپامقله، بر كفرِ عنادى ياپابيلير. گيت گيده كفرِ مطلقه دوشر، إنسانيتى محو اولور. هم مادّى، هم معنوى جهنّمه گيدر. ايشته بز بو مقامده، غايت مختصر إشارتلرله و ميوه رساله‌سنده حشرڭ إثباتنده، سائر أركانِ ايمانيه حشرى ده إثبات ايتدكلرينى قيصه‌جق خلاصه‌لرله بيانى گبى، بو مقامده دخى مجمل فذلكه و مختصر خلاصه‌لرله (جنابِ حقّڭ عنايتيله) بو نكتۀِ أعظم آلتى نقطه‌ده بيان ايديله‌جك