أوت هر مؤمن نمازلردن صوڭره، هر گون هيچ اولمازسه يوز ألليدن زياده ”الحمد ِﷲ“ ”الحمد ِﷲ“ شرعًا ديمسى و معناسى ده أزلدن أبده قدر بر حدسز گنيش حمد و شكرى إفاده ايتمه‌سى، آنجق و آنجق سعادتِ أبديه‌نڭ و جنّتڭ پشين بر فيآتى و معجّل بر بهاسيدر. و دنيانڭ قيصه و فانى ألملرله آلوده اولان نعمتلرينه منحصر اولماز و مخصوص دگل و اونلره ده أبدى نعمتلره وسيله اولمالرى جهتيله باقار، شكر ايدر

”سبحان اﷲ“ كلمۀِ قدسيه‌سى ايسه، جنابِ حقّى شريكدن، قصوردن، نقصانيتدن، ظلمدن، عجزدن، مرحمتسزلكدن، إحتياجدن و آلداتمقدن و كمال و جمال و جلالنه مخالف اولان بتون قصوراتدن تقديس و تنزيه ايتمك معناسيله، سعادتِ أبديه‌يى و جلال و جمال و كمالِ سلطنتنڭ حشمتنه مدار اولان دارِ آخرتى و اونده‌كى جنّتى إخطار ايدوب دلالت و إشارت ايدر. يوقسه سابقًا إثبات ايديلديگى گبى، سعادتِ أبديه اولمازسه هم سلطنتى، هم كمالى، هم جلال، هم جمال، هم رحمتى، قصور و نقصان لكه‌لريله لكه‌دار اولورلر

ايشته بو اوچ قدسى كلمه‌لر گبى، ”لا إلٰهَ إلاّ اﷲ“ و ”بسم اﷲ“ و سائر كلماتِ مباركه، هر برى أركانِ ايمانيه‌نڭ برر چكردگى و بو زمانده كشف ايديلن أت خلاصه‌سى و شَكَرْ خلاصه‌سى گبى، هم أركانِ ايمانيه‌نڭ هم قرآن حقيقتلرينڭ خلاصه‌لرى و بو اوچى نمازڭ چكردكلرى اولدقلرى گبى، قرآنڭ دخى چكردكلرى و پارلاق بر قسم سوره‌لرڭ باشلرنده پيرلانطه گبى گورونمه‌لرى و چوق سنوحاتى تسبيحاتده باشلايان رسالۀِ النورڭ دخى حقيقى معدنلرى و أساسلرى و حقيقتلرينڭ چكردكلريدرلر. و ولايتِ أحمديه و عبوديتِ محمّديه (عليه الصلاة والسلام) جهتنده، اويله بر دائرۀِ ذكرده، نمازدن صوڭره‌كى تسبيحاتده بر طريقتِ محمّديه‌نڭ (ع‌ص‌م) ورديدرلر كه، هر نماز وقتنده يوز ميليوندن زياده مؤمنلر برابر، او حلقۀِ كبراىِ ذكرده، أللرنده تسبيحلر، ”سبحان اﷲ“ اوتوز اوچ، ”الحمد ِﷲ“ اوتوز اوچ، ”اﷲ أكبر“ اوتوز اوچ دفعه تكرار ايدرلر