(غايت أهمّيتلى بر نكتۀِ إعجازيه‌يه دائر، بردن إختيارسز، مغربدن صوڭره قلبه إخطار ايديلن و سورۀِ {قُلْ اَعُوذُ بِرَبِّ الْفَلَقِ}ڭ ظاهر بر معجزۀِ غيبيه‌سنى گوسترن اوزون بر حقيقته قيصه بر إشارتدر

ايشته يالڭز معناىِ إشارى جهتنده بو سورۀِ عظيمۀِ خارقه: ”كائناتده عدم عالملرى حسابنه چاليشان شريرلردن و إنسى و جنّّى شيطانلردن كنديڭزى محافظه ايديڭز.“ پيغمبريمزه و امّتنه أمر ايده‌رك، هر عصره باقديغى گبى معناىِ إشاريسيله بو عجيب عصريمزه داها زياده، بلكه ظاهر بر طرزده باقار؛ قرآنڭ خدمتكارلرينى إستعاذه‌يه دعوت ايدر. بو معجزۀِ غيبيه، بش إشارتله قيصه‌جه بيان ايديله‌جك. شويله كه

بو سوره‌نڭ هر بر آيتنڭ معنالرى چوقدر. يالڭز معناىِ إشارى ايله بش جمله‌سنده درت دفعه ”شرّ“ كلمه‌سنى تكرار ايتمك و قوّتلى مناسبتِ معنويه ايله برابر درت طرزده بو عصرڭ أمثالسز درت دهشتلى و فورطنه‌لى مادّى و معنوى شرلرينه و إنقلابلرينه و مبارزه‌لرينه عين تاريخيله پارمق باصمق و معنًا ”بونلردن چكينڭز“ أمر ايتمك، ألبته قرآنڭ إعجازينه ياقيشير بر إرشادِ غيبيدر