ايشته شيمدى گل، ايمان نوريله بو كلّى ايكنجى ميوه‌يه باق و طات؛ ناصل كائناتى باشدن باشه شنلنديروب، گوزللشديروب بر مسجدِ أكبره و بيوك بر عبادتخانه‌يه چويرييور. و فن و فلسفه‌نڭ صوغوق، حياتسز، ظلمتلى، دهشتلى گوسترمه‌لرينه مقابل؛ حياتلى، شعورلى، ايشيقلى، انسيتلى، طاتلى بر كائنات گوستره‌رك باقى حياتڭ بر جلوۀِ لذّتنى أهلِ ايمانه درجه‌سنه گوره دنياده دخى طاتديرر

تتمّه: ناصلكه وحدت و أحديت سرّيله كائناتڭ هر طرفنده عين قدرت، عين إسم، عين حكمت، عين صنعت بولونماسيله خالقڭ وحدت و تصرّفى و ايجاد و ربوبيتى و خلاّقيت و قدسيتى، جزئى كلّى هر بر مصنوعڭ حال ديلى ايله إعلان ايديلييور. عينًا اويله ده؛ هر طرفده مَلكلرى خلق ايدوب هر مخلوقڭ لسانِ حال ايله شعورسز ياپدقلرى تسبيحاتى، مَلكلرڭ عبوديتكارانه ديللريله ياپديرييور. مَلكلرڭ هيچ بر جهتده خلافِ أمر حركتلرى يوقدر. خالص بر عبوديتدن باشقه هيچ بر ايجاد و أمرسز هيچ بر مداخله، حتّى إذنسز شفاعتلرى دخى اولماز. تام {بَلْ عِبَادٌ مُكْرَمُونَ ❊ وَ يَفْعَلُونَ مَا يُؤْمَرُونَ} سرّينه مظهردرلر