چوق أماره‌لرله قطعى قناعتم گلمش كه؛ حكومت حسابنه، ”حسّياتِ دينيه‌يى آلَت ايده‌رك أمنيتِ داخليه‌يى إخلال ايتمك“ ايچون بزه هجوم ايديلمييور. بلكه بو يالانجى پرده آلتنده، زندقه حسابنه، بزم ايمانمز ايچون و ايمانه و أمنيته خدمتمز ايچون بزه هجوم ايديلديگنه چوق حجّتلردن بر حجّتى شودر كه: يگرمى سنه ظرفنده، رسالۀِ نورڭ يگرمى بيڭ نسخه‌لرى و پارچه‌لرينى يگرمى بيڭ آدملر اوقويوب قبول ايتدكلرى حالده، رسالۀِ نورڭ شاكردلرى طرفندن أمنيتڭ إخلالنه دائر هيچ بر وقوعات اولمامش و حكومت قيد ايتمه‌مش و أسكى و يڭى ايكى محكمه بولمامش. حالبوكه، بويله كثرتلى و قوّتلى پروپاغنده، يگرمى گونده وقوعاتلر ايله كندينى گوستره‌جكدى. ديمك حرّيتِ وجدان پرنسيبنه ضد اولارق، بتون ديندار نصيحتجيلره شامل، لاستيكلى بر قانونڭ (١٦٣) نجى مادّه‌سى ساخته بر ماسكه‌در. زنديقلر، بعض أركانِ حكومتى إغفال ايده‌رك، عدليه‌يى شاشيرتوب، بزى هر حالده أزمك ايسته‌يورلر

مادام حقيقت بودر، بز ده بتون قوّتمزله ديرز: أى ديننى دنيايه صاتان و كفرِ مطلقه دوشن بدبختلر! ألڭزدن نه گليرسه ياپيڭز. دنياڭز باشڭزى يسين و ييه‌جك! يوزر ميليون قهرمان باشلر فدا اولدقلرى بر قدسى حقيقته، باشمز دخى فدا اولسون! هر جزا و إعدامڭزه حاضرز! حپسڭ خارجى بو وضعيتده، يوز درجه داخلندن داها فنادر. بزه قارشى گلن بويله بر إستبدادِ مطلق آلتنده هيچ بر حرّيت (نه حرّيتِ علميه، نه حرّيتِ وجدان، نه حرّيتِ دينيه) اولمامسندن، أهلِ ناموس و ديانت و طرفدارِ حرّيت اولانلره يا ئولمك ويا حپسه گيرمكدن باشقه بر چاره قالماز. بز ده {اِنَّا ِﷲِ وَاِنَّا اِلَيْهِ رَاجِعُونَ} دييه‌رك ربّمزه طايانييورز