اونلره ديدم: بن، اون‌سكز يگرمى سنه‌در منزوى ياشايورم. هم قسطمونيده سكز سنه‌در قره‌قول قارشيسنده و سائر يرلرده دخى يگرمى سنه‌در دائما ترصّد و نظارت آلتنده قاچ دفعه منزلمى تحرّى ايتدكلرى حالده، دنيا ايله، سياست ايله هيچ بر ترشّح، هيچ بر أماره گورولمدى. أگر بر قاريشق حالم اولسيدى، اورانڭ عدليه و ضابطه‌سى بيلمدى ويا بيلدى آلديرمدى ايسه، ألبته بندن زياده اونلر مسؤلدرلر. أگر يوقسه، بتون دنياده كندى آخرتى ايله مشغول اولان منزويلره ايليشيلمديگى حالده، نه‌دن بڭا لزومسز، وطن و ملّت ضررينه بو درجه ايلشييورسڭز

بز رسالۀِ نور شاكردلرى، رسالۀِ نورى دگل دنيا جريانلرينه، بلكه كائناته ده آلَت ايده‌مه‌يز. هم قرآن بزى سياستدن شدّتله منع ايتمش. أوت رسالۀِ نورڭ وظيفه‌سى ايسه، حياتِ أبديه‌يى محو ايدن و حياتِ دنيويه‌يى ده دهشتلى بر زهره چويرن كفرِ مطلقه قارشى، ايمانى اولان حقيقتلرله غايت قطعى و أڭ متمرّد زنديق فيلسوفلرى دخى ايمانه گتيرن قوّتلى برهانلر ايله قرآنه خدمت ايتمكدر. اونڭ ايچون رسالۀِ نورى هيچ بر شيئه آلَت ايده‌مه‌يز

أوّلا: قرآنڭ ألماس گبى حقيقتلرينى، أهلِ غفلت نظرنده بر پروپاغندۀِ سياست توهّميله جام پارچه‌لرينه اينديرمه‌مك و او قيمتدار حقيقتلره إهانت ايتمه‌مكدر

ثانيًا: رسالۀِ نورڭ أساس مسلگى اولان شفقت، حق و حقيقت و وجدان، بزلرى شدّتله سياستدن و إداره‌يه ايليشمكدن منع ايتمش. چونكه طوقاته و بلايه مستحق و كفرِ مطلقه دوشمش بر ايكى دينسزه متعلّق يدى سكز چولوق چوجق، خسته، إختيار معصوملر بولونور. مصيبت و بلا گلسه، او بيچاره‌لر دخى يانارلر. بونڭ ايچون، نتيجه‌نڭ ده حصولى مشكوك اولديغى حالده، سياست يوليله إداره و آسايشڭ ضررينه حياتِ إجتماعيه‌يه قاريشمقدن شدّتله منع ايديلميشز