ثالثًا: بو وطنڭ و بو ملّتڭ حياتِ إجتماعيه‌سى بو عجيب زمانده آنارشيلكدن قورتولمق ايچون بش أساس لازم و ضروريدر: حرمت، مرحمت، حرامدن چكينمك، أمنيت، سرسريلگى بيراقوب إطاعت ايتمكدر. رسالۀِ نور حياتِ إجتماعيه‌يه باقديغى زمان، بو بش أساسى قوّتلى و قدسى بر صورتده تثبيت و تحكيم ايده‌رك، آسايشڭ تمل طاشنى محافظه ايتديگنه دليل ايسه؛ بو يگرمى سنه ظرفنده رسالۀِ نورڭ، يوز بيڭ آدمى وطن و ملّته ضررسز برر عضوِ نافع حالنه گتيرمه‌سيدر. إسپارطه و قسطمونى ولايتلرى بوڭا شاهددر. ديمك رسالۀِ نورڭ أكثريتِ مطلقه أجزالرينه ايليشنلر، هر حالده بيله‌رك ويا بيلميه‌رك آنارشيلك حسابنه وطنه و ملّته و حاكميتِ إسلاميه‌يه خيانت ايدرلر. رسالۀِ نورڭ، يوز اوتوز رساله‌لرينڭ بو وطنه يوز اوتوز بيوك فائده‌سنى و حسنه‌سنى، وهّام أهلِ غفلتڭ سطحى نظرلرنده قصورلى توهّم ايديلن ايكى اوچ رساله‌نڭ موهوم ضررلرى چوروته‌مز. اونلرى بونلر ايله چوروتن، غايت درجه‌ده إنصافسز بر ظالمدر

امّا بنم أهمّيتسز شخصمڭ قصورلرى ايسه، بِالمجبوريه ايسته‌ميه‌رك ديرم كه: يگرمى ايكى سنه مدّتنده غربتده حپسِ منفرد حكمنده، يالڭز و منزوى اولارق حيات گچيرن و بو مدّت ظرفنده إختياريله بر دفعه چارشويه و مجمعِ ناس بيوك جامعلره گيتمه‌ين و چوق تضييق و صيقنتى ويريلديگى حالده، بتون أمثالى منفيلره مخالف اولارق إستراحتى ايچون بر تك دفعه حكومته مراجعت ايتمه‌ين و يگرمى سنه ظرفنده هيچ بر غزته‌يى اوقوميان و ديڭله‌مه‌ين و مراق ايتمه‌ين و تام ايكى سنه قسطمونيده و يدى سنه باشقه منفالرنده بتون ياقين و گوروشن دوستلرينڭ شهادتيله، كُرۀِ أرض يوزنده‌كى بوغوشمه‌لرى و حربلرى و صلح اولمش و اولمامش و داها كيملر حرب ايتدكلرينى بيلمه‌ين و مراق ايتمه‌ين و صورميان و اوچ سنه ياقيننده قونوشان راديويى اوچ دفعه‌دن باشقه ديڭله‌مه‌ين و حياتِ أبديه‌يى إمحا ايدن و حياتِ دنيويه‌يى دخى ألم ايچنده ألمه، عذاب ايچنده عذابه چويرن كفرِ مطلقه قارشى غالبانه رسالۀِ نور ايله مقابله ايتديگنه اونڭ ايله ايمانلرينى قورتاران يوز بيڭ شاهدڭ شهادتيله إثبات ايدن و قرآندن ترشّح ايدن رسالۀِ نور ايله ئولومى يوز بيڭ آدم حقّنده إعدامِ أبديدن ترخيص تذكره‌سنه چويرن بر آدمه بو درجه ايليشمك و مأيوس ايتمك و اونى آغلاتمقله، او معصوم يوز بيڭلر قارداشلرينى آغلاتمايه هانگى قانون وار؟ هانگى مصلحت وار؟ عدالت نامنه أمثالسز بر غدر اولماز مى؟ و قانون حسابنه، أمثالسز بر قانونسزلق دگل مى