صوڭره بريسى صوردى كه: ”او ئولديگى زمان إستانبولده ديكيلى طاشده شيطان دنيايه باغيره‌جق كه؛ فلان ئولدى.“ او وقت بن ديدم: ”تلغرافله خبر ويريله‌جك.“ فقط بر زمان صوڭره راديو چيقمش ايشيتدم. أسكى جوابم تام دگلمش بيلدم. سكز سنه صوڭره دار الحكمتده ايكن ديدم: ”شيطان گبى راديو ايله دنيايه ايشيتديره‌جك.“ صوڭره سدِّ ذو القرنيْن و يأجوج و مأجوج و دابّة الأرض و دجّال و نزولِ عيسى (ع‌س) حقّنده سؤاللر صورمشلردى. بن ده جواب ويرمشدم. حتّى أسكى رساله‌لرمده اونلر قسمًا يازيلمشلر

بر زمان صوڭره مصطفى كمال ايكى دفعه شفره ايله، وان ولايتنڭ أسكى واليسى و بنم دوستم تحسين بگڭ واسطه‌سيله بنى (نشر ايديلن خطواتِ ستّه‌يه مكافاةً تلطيف ايچون) آنقره‌يه جلب ايتدى، گيتدم. شيخ سنوسى كردجه لسانى بيلمديگندن بنى اونڭ يرنده اوچ يوز ليرا معاشله ولاياتِ شرقيه واعظِ عموميسى، هم مبعوث، هم ديانت رياستى دائره‌سنده دار الحكمت أعضالريله برابر أسكى وظيفه‌م ايله ممنون ايتمك و بنم وانده تملنى آتديغم مدرسة الزهرا و شرق دار الفنونمه سلطان رشادڭ ويرديگى اون طوقوز بيڭ آلتون ليرا (ايكى يوز مبعوث ايچنده يوز آلتمش اوچ مبعوثڭ إمضاسيله) يوز أللى بيڭ بانقنوطه إبلاغ ايديله‌رك قبول ايديلديگى حالده؛ بن بشنجى شعاع أصلنڭ ويرديگى خبرڭ بر قسمنى، اوراده بر آدمده گوردم. مجبوريتله او چوق أهمّيتلى وظيفه‌لرى بيراقدم. و بو آدمله باشه چيقيلماز، مقابله ايديلمز دييه، دنيايى و سياستى و حياتِ إجتماعيه‌يى ترك ايدوب يالڭز ايمانى قورتارمق يولنده وقتمى صرف ايتدم. فقط بعض ظالم و إنصافسز مأمورلر، بڭا دنيايه باقه‌جق ايكى اوچ رساله‌يى يازديرديلر