اوننجيسى: عدليه‌ده عدالت حقيقتى و مراجعت ايدن هركسڭ حقوقنى بِلا تفريق محافظه‌يه، صِرف حق نامنه چاليشمق وظيفه‌سى حكم ايتديگنه بناءًدر كه؛ إمامِ على (رض) خلافتى زماننده بر يهودى ايله برابر محكمه‌ده اوطوروب، محاكمه اولمشلر. هم بر عدليه رئيسى بر مأمورى، قانونجه بر خيرسزڭ ألنى كسديگى وقت او مأمورڭ او ظالم خيرسزه حدّت ايتديگنى گوردى. او دقيقه‌ده او مأمورى عزل أيلدى. هم چوق تأسّف ايده‌رك ديدى: شيمدى‌يه قدر عدالت نامنه بويله حسّياتنى قاريشديرانلر پك چوق ظلم ايتمشلر. أوت حُكمِ قانونى إجرا ايتمكده او محكومه آجيماسه ده حدّت ايده‌مز، ايتسه ظالم اولور. حتّى قصاص جزاسى ده اولسه حدّتله قتل ايتسه، بر نوع قاتل اولور دييه او حاكمِ عادل ديمش

ايشته مادام محكمه‌ده بويله خالص و غرضسز بر حقيقت حكم ايدييور. اوچ محكمه بزلره برائت ويرديگى و بو ملّتڭ يوزده (بيلسه‌لر) بلكه طقسانى، نور طلبه‌لرينڭ ضررسز اولارق ملّته و وطنه منفعتلى اولدقلرينه پك چوق أماره‌لرله شهادت ايتدكلرى حالده، بوراده او معصوم و تسلّى‌يه و عدالتڭ إلتفاتنه چوق محتاج نور طلبه‌لرينه قارشى إهانتلر و غايت صوغوق حدّتلى معامله‌لر ياپيلييور. بز هر مصيبته و إهانتلره قارشى صبره و تحمّله قرار ويرديگمزدن سكوت ايدوب اللّٰهه حواله ايده‌رك؛ ”بلكه بونده ده بر خير وار“ ديدك. فقط أوهام يوزندن و غرضكارلرڭ ژورناللريله بو بيچاره معصوملره بويله معامله‌لر بلالرڭ گلمه‌سنه بر وسيله اولاجغندن قورقدم، بونى يازمغه مجبور اولدم. ذاتًا بو مسئله‌ده بر قصور وارسه بنمدر. بو بيچاره‌لر، صِرف ايمانلرى و آخرتلرى ايچون بڭا رضاءِ إلٰهى دائره‌سنده يارديم ايتمشلر. پك چوق تقديره مستحق ايكن بويله معامله‌لر، حتّى قيشى دخى حدّته گتيردى

هم مدارِ حيرتدر كه، بو دفعه ده ينه بر جمعيت وهمنى تكرار ايلرى سورويورلر. حالبوكه اوچ محكمه بو جهتى تدقيق ايدوب برائت ويرمكله برابر مابيْنمزده بويله مدارِ إتهام اولاجق هيچ بر جمعيت، هيچ بر أماره محكمه‌لر، ضابطه‌لر، أهلِ وقوفلر بولمامشلر. يالڭز بر معلّمڭ طلبه‌لرى و دار الفنون شاكردلرى و قرآن درسنى ويرن حافظڭ حفظه چاليشانلرى گبى، رسالۀِ نور طلبه‌لرنده بر اُخروى قارداشلق وار. بونلره جمعيت نامنى ويرن و اونڭله إتهام ايدن، بتون أصناف و مكتبليلره و واعظلره، سياسى جمعيت نظريله باقمق گركدر. بونڭ ايچون بن بويله أصلسز و معناسز إتهاملرله بورايه حپسه گلنلرى مدافعه ايتمگه لزوم گورمييورم