بشنجيسى: رسالۀِ نورله مبارزه ايديلمز، او مغلوب اولماز. يگرمى سنه‌در أڭ معنّد فيلسوفلرى صوصديرييور. ايمان حقيقتلرينى گونش گبى گوسترييور. بو مملكتده حكم ايدن، اونڭ قوّتندن إستفاده ايتمك گركدر

آلتنجيسى: بنم أهمّيتسز شخصمڭ قصورلريله بنى چوروتمك و إهانتلرله نظرِ عامّه‌دن دوشورمك؛ رسالۀِ نوره ضرر ويرمز، بلكه بر جهتده قوّت ويرر. چونكه بنم بر فانى ديلمه بدل رسالۀِ نورڭ يوز بيڭ نسخه‌لرينڭ باقى ديللرى صوصماز، قونوشور. و خالص طلبه‌لرى، بيڭلر قوّتلى لسانلر ايله او قدسى و كلّى وظيفۀِ نوريه‌يى شيمدى‌يه قدر اولديغى گبى، إن شاء اﷲ قيامته قدر دوام ايتديره‌جكلر

يدنجيسى: سابق محكمه‌لرده دعوا ايتديگم و حجّتلرينى گوسترديگمز گبى؛ بزم گيزلى دشمنلريمز و حكومتى إغفال و بر قسم أركاننى أوهاملانديران و عدليه‌لرى عليهمزه سَوق ايدن رسمى و غيرِ رسمى معارضلريمز، يا غايت فنا بر صورتده آلدانمش ويا آلداتيلمش ويا آنارشيلك حسابنه غايت غدّار بر إختلالجيدر ويا إسلاميته و حقيقتِ قرآنه قارشى مرتدانه مجادله ايدن بر دسّاس زنديقدر كه؛ بزه هجوم ايتمك ايچون إستبدادِ مطلقه جمهوريت نامنى ويرمكله، إرتدادِ مطلقى رژيم آلتنه آلمقله، سفاهتِ مطلقه مدنيت نامنى طاقمقله، جبرِ كيفئِ كفرى‌يه قانون نامنى ويرمكله؛ هم بزى پريشان، هم حكومتى إغفال، هم عدليه‌يى بزمله معناسز مشغول أيلديلر. اونلرى قهّارِ ذو الجلالڭ قهرينه حواله ايدوب، كنديمزى اونلرڭ شرّندن محافظه ايچون {حَسْبُنَا اﷲُ وَنِعْمَ الْوَكِيلُ} قلعه‌سنه إلتجا ايدرز