دردنجيسى: بن بكله‌يوردم كه: يا آنقره ويا آفيون بنى صورغوده (پك بيوك مسئله‌لر ايچون، نورلرڭ او مسئله‌لره خدمتى جهتنده) بر مشورت دائره‌سنه آلوب بر سؤال و جواب بكلردم. أوت، اوچ يوز أللى ميليون مسلمانلرڭ أسكى قارداشلغنى و محبّتنى و حسنِ ظنّنى و معنوى يارديملرينى بو مملكتده‌كى ملّته قزانديره‌جق چاره‌لرى بولمق كه، أڭ قوّتلى چاره و وسيله رسالۀِ نور اولديغنه بر أماره‌سى شودر

بو سنه مكّۀِ مكرّمه‌ده غايت بيوك بر عالم هم هند لساننه، هم عرب لساننه نورڭ بيوك مجموعه‌لرينى ترجمه ايدوب هندستانه و عربستانه گوندره‌رك أڭ قوّتلى نقطۀِ إستناديمز اولان وحدت و اخوّتِ إسلاميه‌يى تأمينه چاليشديغى گبى، تورك ملّتنڭ دائما دينده و ايمانده ايلرى اولديغنى نور رساله‌لرى ايله گوسترييور، ديمشلر

هم بكلردم كه؛ ”وطنمزده آنارشيلگه إنقلاب ايدن قومونيست تهلكه‌سنه قارشى نورلرڭ خدمتى نه درجه‌ده‌در و بو مبارك وطن بو دهشتلى سيلاندن ناصل محافظه ايديله‌جك؟“ گبى طاغ مِثللو مسئله‌لرڭ صورولماسنڭ لزومى واركن، سينك قنادى قدر أهمّيتى اولميان و هيچ بر مدارِ مسئوليت اولميان جزئى و شخصى و غرضكارلرڭ إفترالريله حبّه، قبّه‌لر ياپيلمش مسئله‌لر ايچون بو آغير شرائط آلتنده هيچ عمرمده چكمه‌ديگم بر پريشانيتمه سببيت ويريلدى. بزه اوچ محكمه‌نڭ صورديغى و برائت ويرديگى عين مسئله‌لردن و عادى و شخصى بر ايكى مسئله ايچون معناسز سؤاللر ايديلدى